Ákim atap ótkendeı, áleýmettik mańyzy bar ónimderdiń baǵasyn tejeý jumysy 2022 jyldyń kúzinde bastalǵan. Bul maqsatqa ákimdik 15 mlrd teńge bóldi. Kóktemde alǵashqy egin bastalady. Ákim sol kezde jyldam ósetin pozısııalardyń baǵasy óz ornyna keledi dep úmittenedi.
«Qalada «Altyn Ordadan» basqa jetkizýshiler paıda boldy. Iri jeliler jetkizýshilermen tikeleı jumys isteı bastady, sondyqtan baǵa tómendedi. Basqa kóterme saýdagerler de tıimdi sheshim tabady dep senemiz», dedi Erbolat Dosaev.
Ol qalaǵa kókónis, jemis-jıdek, ettiń 75%-y «Altyn Orda» bazary arqyly jetkiziletinin basa aıtyp, baǵanyń kúrt tómendeýin kútýdiń qajeti joq ekenin nazarǵa saldy.
«Biz Aqsý qant zaýytymen kelisimge qol qoıdyq, men bul jobaǵa 2,6 mıllıard teńge bóldim. Bıyl qant baǵasy sharyqtamaıdy dep úmittenemin. Nan baǵasy turaqty bolyp tur, biz ony sýbsıdııaladyq. Jergilikti bıýdjetten qarajat bólingen», dedi ákim.
Bul rette azyq-túlikten basqa taýarlardyń baǵasy kóterilip jatyr. Ákim muny geosaıası jaǵdaımen baılanystyryp otyr.
«Naýryzbaı aýdanyna kelsek, kóterme saýdanyń damýynyń ózi joǵary deńgeıde emes jáne bir-birimen básekege túsetin dúkender az. Biraq biz ony baqylaýda ustaımyz, kúsh salamyz. Usynysyn aıta kelgen kásipkerlerdi qoldadyq. Birinshi toqsannyń qorytyndysy boıynsha neniń ózgergenin, neniń ózgermegenin qaraımyz», dep túıindedi Almaty ákimi.
