«Kezdesý orny belgili sebeptermen beıtarap aýmaq bolyp belgilendi», dedi Qyrǵyzstan Prezıdentiniń baspasóz hatshysy Erbol Sultanbaev. Aldymen Sadyr Japarov óziniń Facebook paraqshasynda úndeý jarııalap, onda jahandaný dáýirinde ishki turaqtylyq pen ulttyq birlikke umtylǵan elder ǵana damyp, qýatty memleketke aınalatyny jóninde, jazba qaldyrdy.
«Eýrazııa jerinde uly derjavalar qurǵan ejelgi qyrǵyzdardyń búgingi qaly qandaı? Birliktiń joqtyǵynan, bılik úshin kúrestiń kesirinen biz ejelgi ımperııamyzdan aıyrylyp, Ortalyqtyń bir buryshynda qalyp bara jatqan sııaqtymyz. Táýelsizdigimizdi jarııalasaq ta, damýymyz nege báseńdep barady? Bizde qazir soltústik-ońtústik dep, jeti oblysqa bólinip otyrǵan jaıy bar. Osylaısha ókinishke oraı, qazir Qyrǵyzstan halqy óz óńirlerinen shyqqan prezıdentterdi jaqtap, sol arqyly taǵy jetige bólinip otyr. Qyrǵyzstannyń bolashaǵy biz úshin mańyzdy bolsa, «Aqaev», «Bakıev», «Atambaev», «Otýnbaeva», «Jeenbekov», «ómirdiń aıaqtalýy» sekildi uǵymdardy joıýymyz kerek. Barshanyń basyn biriktire otyryp, halyqtyń bolashaǵyn oılaýǵa tıispiz. Bastapqyda halyq saılaǵan, sońy qaıǵyly bolǵan barlyq prezıdentterdi jınasaq, bálkim, bir judyryqtaı jumylǵan birtutas el bolarmyz degen oı meni kópten beri qınap júrdi», dep jazdy S.Japarov.
Sonymen qatar Qyrǵyz memleketiniń basshysy el esinde qalǵan keleńsiz dáýirlerdi eske aldy.
«Burynǵy prezıdentter renishterin aıtyp, kemshilikterin moıyndady. Eń bastysy, olar bir-birin keshire bildi. Meniń de kózdegen maqsatym sol edi. Meniń oıymsha tek ár prezıdenttiń jaqtastary, jeti oblystyń halqy saıasatty tastap, bir baǵytqa shoǵyrlanyp, ulttyń, ekonomıkanyń damýyn oılaýy kerek. Halqymyzdyń kózqarasy boıynsha qarasańyz, qatelik árkimde kezdesedi. Qaıǵyly oqıǵalar, tipti qantógis boldy. Aqaevtyń kezinde – Aqsyı oqıǵasy, Bakıevtiń kezinde – sáýir oqıǵasy, Ýaqytsha úkimet kezinde – maýsym tragedııasy, Jeenbekovtiń kezinde – qazan oqıǵasy. О́kinishke qaraı, Qyrǵyzstan tarıhynda bul oqıǵalardyń bári qara tańbamen jazylǵan. Osylaısha, qyrǵyz jastarynan – uldarymyzdan aıyryldyq. Qaza bolǵandardyń týystary men jaqyndarynyń narazylyǵyn túsinemin. Ár qyrǵyzstandyq birigýi kerek! 5-10 jyldyq múddeni oılamaı, Qyrǵyzstannyń múddesin oılaıyq. Maǵan deıin kelgen memleket basshylarynyń árqaısysyna jeke múddem de, jeke qyzǵanyshym da joq. Osyny basa aıtýym kerek», dep aıaqtady jazbasyn Qyrǵyzstan prezıdenti.
О́z úndeýin Sadyr Japarov bizdiń zamanymyzdyń IX ǵasyryndaǵy Qyrǵyz qaǵanatynyń kartasymen úılestirip, sýretin jarııalady. Al sarapshylar Sadyr Japarovtyń bastamasyn «batyl qadam» dep baǵalap, Qyrǵyzstannyń burynǵy prezıdentteriniń bul basqosýynyń túp maqsatyn «Jer-jerge bólinbeı, tutas qyrǵyz eliniń múddesi úshin birigip jatyr» dep túsindirgen.
