QR TJM qutqarýshylary men Apattar medısınasy ortalyǵynyń dárigerleri bar bort Astana áýejaıyna qondy. Olardy qazaqstandyqtar, týystary, dostary men áriptesteri kútip aldy. Tótenshe jaǵdaılar mınıstri Iýrıı Ilın jáne Túrkııa Respýblıkasynyń Qazaqstan Respýblıkasyndaǵy Tótenshe jáne О́kiletti elshisi Ýfýk Ekıdjı (Ufuk Ekici) bizdiń qutqarýshylarymyzdy kútip aldy jáne olardyń árqaısysyna atqarǵan qıyn jumysy úshin alǵysyn bildirdi.
Memleket basshysynyń tapsyrmasy boıynsha 7 aqpanda qutqarý bólimsheleriniń kúshteri men quraldary, onyń ishinde Qazaqstan TJM tehnıkasy, Apattar medısınasy ortalyǵynyń dárigerleri jáne kınologııalyq eseptoptar alǵashqylardyń biri bolyp eki eshelonmen jolǵa shyǵyp, eń kúrdeli qıraǵan obektilerde izdestirý-qutqarý jumystaryn júrgizýge kirisken bolatyn. Qazaqstandyq qutqarýshylar tobyn Tótenshe jaǵdaılar birinshi vıse-mınıstri Ibragım Kúlshimbaev basqardy.
Eske salaıyq, Túrkııanyń úsh óńirinde izdestirý-qutqarý jumystaryn júrgizý bastalǵannan beri Qazaqstan TJM qutqarýshylarynyń kúshteri 7 adamdy qutqardy. Qaza tapqan 88 adamnyń, onyń ishinde 10 balanyń denesi shyǵaryldy.
