V.Pýtın kezekti joldaýyn qazirgi álemdik daǵdarysqa tap kelgen kúrdeli kezeńde joldap otyrǵanyn aıtyp, sózin Reseı men Ýkraına arasyndaǵy máseleden bastady. Ol bir jyl buryn Ýkraınǵa qarsy ne úshin arnaıy áskerı operasııa bastaǵanyn halqyna túsindirip ótti.
Onyń aıtýynsha, Reseı Ýkraına halqymen qaqtyǵysyp jatqan joq, olar eldegi rejim men Batystaǵy qojaıyndardyń tutqynyna aınalǵan. Úndeýiniń basym bóliginde eki el arasyndaǵy qaqtyǵys pen Amerıka, Batys, NATO-nyń «teris» áreketterin aıtqan V.Pýtın sózin halqyna alǵys aıtýmen jalǵastyrdy.
Sondaı-aq V.Pýtın «týǵan-týystarynan, jaqyndarynan aıyrylǵan otbasylarǵa qoldaý kórsetý, olardyń bala-shaǵasyn ósirýge, tárbıeleýge, bilim men kásippen qamtamasyz etý – bizdiń mindetimiz», dep arnaıy memlekettik qor qurylatynyn aıtty.
Buǵan qosa, Reseı prezıdenti keshirim surady. Alaıda kimderden ekenin aıtpady. «Keshirińizder, búgin barlyǵynyń esimin ataı almaımyn. Men osy úndeýimdi ázirlep jatqanymda batyrlyq kórsetkenderdiń uzyn tizimin jasadym, biraq sóıleıtin sózimnen alyp tastadym, óıtkeni barlyǵynyń esimin atap ótý múmkin emes, aty atalmaı qalǵan jaǵdaıda adamdardy renjitip alamyn ba dep qoryqtym», dedi V.Pýtın.
Eldiń ekonomıkalyq jaǵdaıy men aldaǵy atqarylar jumysyna toqtalǵan Reseı prezıdenti Qara jáne Azov teńizderindegi porttardyń áleýmetin arttyrýdy kózdep otyr.
– Biz Qara jáne Azov teńizderindegi porttarǵa erekshe kóńil bóletin bolamyz. Qazirdiń ózinde biraz jumys atqaryldy. «Soltústik-Ońtústik» halyqaralyq dálizine de erekshe kóńil bólýdi jalǵastyramyz. Máselen, qazir Edil-Kaspıı kanaly arqyly 4,5 metrden kem emes kemeler ári-beri qatynap jatyr. Bul Úndistan, Iran, Pákistan jáne Taıaý Shyǵys elderimen iskerlik yntymaqtastyqtyń jańa baǵyttaryn ashady. Biz bul dálizdi damytýdy toqtatpaımyz, – dedi ol.
Reseı basshysy Ońtústik-Shyǵys Azııa naryǵyna Qazaqstan arqyly shyǵýǵa nıetti ekenin de aıtyp ótti.
– Jańa geosaıası jaǵdaıǵa baılanysty logıstıkany ózge joldarmen damytamyz. Máskeý-Qazan avtomagıstralin Ekaterınbýrgke, Chelıabınskige, Túmenge deıin uzartyp, odan ári Irkýtsk pen Vladıvostokqa jetkizemiz, Qazaqstanǵa, odan ári Mońǵolııa men Qytaıǵa da shyǵýdy oılastyramyz, – dedi V.Pýtın.
Sonymen qatar joldaýda V.Pýtın AQSh-pen Iаdrolyq qarýdy azaıtý týraly ózara kelisimdi (the New START nuclear arms reduction treaty) ýaqytsha toqtatatynyn habarlady. Eske salsaq, 2010 jyly AQSh-tyń sol kezdegi prezıdenti Barak Obama men Reseıdiń sol kezdegi prezıdenti Dmıtrıı Medvedev ıadrolyq qarýdy azaıtý týraly kelisimge kelip, resmı qujatqa qol qoıǵan edi.
Osyndaı basty máselelerge toqtalǵan Reseı basshysy: «Reseı kez kelgen synaqqa qarsy turyp, jaýap beredi, óıtkeni biz bárimiz bir elmiz, bir úlken jáne birtutas halyqpyz. Biz ózimizge, óz qabiletterimizge senimdimiz. Shyndyq bizdiń jaǵymyzda», dep joldaýyn aıaqtady.
V.Pýtın osy kezekti joldaýyn ótken jyldyń jeltoqsan aıynda jasaýy kerek edi, alaıda sarapshylardyń aıtýynsha, Reseı men Ýkraınadaǵy qaqtyǵysqa baılanysty keıinge qaldyrylǵan.
