Bul týraly oblys ortalyǵynda ótken brıfıngte Mańǵystaý oblystyq ekonomıka jáne bıýdjettik josparlaý basqarmasy basshysynyń orynbasary Laýra Muhambetova málimdedi. Onyń aıtýynsha, bıyl aýyldyq eldi mekenderge jumys isteýge kelgen mamandar 100 AEK, ıaǵnı 345 myń teńge mólsherinde kóterme járdemaqy jáne úı satyp alý úshin 1500 AEK, ıaǵnı 5 175 500 teńgeden aspaıtyn somada bıýdjettik kredıt túrindegi áleýmettik qoldaýǵa ıe bola alady.
– «Dıplommen – aýylǵa!» baǵdarlamasyna bilim berý, densaýlyq saqtaý, áleýmettik qamsyzdandyrý, mádenıet, sport jáne veterınarııa mamandyǵy, aýyl, kent, aýyldyq okrýgter ákimderi apparatynyń bas jáne jetekshi mamandary úmitker bola alady. Sonymen qatar kóterme járdemaqy jáne turǵyn úı satyp alýǵa nemese salýǵa bıýdjettik kredıt berý tıisti qarjy jylyna qarjylandyrý josparyna sáıkes bólingen soma sheginde júzege asyrylady, – dedi Laýra Muhambetova.
Byltyr oblys boıynsha 2022 jyly 423 mamanǵa barlyǵy 131 mln teńge járdemaqy berilgen. Al 208 maman 15 jylǵa deıingi merzimge 0,01% mólsherindegi syıaqy mólsherlemesimen bıýdjettik nesıe alǵan. Sonyń biri – 2020 jyly Almaty qalasynda oqýyn bitirip kelgen jas maman Gaýhar Túgel. Búginde jas maman Munaıly aýdanynyń Dáýlet eldi mekenindegi №4 jalpy bilim beretin mektepte pedagog-logoped mamany retinde qyzmet etedi.
– «Dıplommen – aýylǵa!» baǵdarlamasyn uzaq ýaqyt zerttedim. Onyń artyqshylyqtaryn izdep, jas mamandar úshin tıimdilikterin qarastyrdym. Bul joba tek jas mamandar úshin emes, birneshe jyl tájirıbesi bar qyzmetkerlerge de kómegi kóp ekenin bilgennen keıin baǵdarlama arqyly jumysqa ornalasýǵa sheshim qabyldadym. Sonyń arqasynda, 2022 jyldaǵy somaǵa sáıkes 306 300 teńge qaıtarymsyz jardemaqy jáne baspana alýǵa 4 mln 594 myń teńge bıýdjettik kredıt túrindegi áleýmettik qoldaýǵa ıe boldym, – deıdi Gaýhar Túgel.
