Baıqońyr aýdanynda TJD qyzmetkerlerine alǵys bildirý maqsatynda «Batyrlarǵa alǵys!» is-sharasy ótti.
Qutqarýshylar kún saıyn óz ómirin qaýipke tige otyryp, ózgelerdiń ómirin saqtap qalady.
Is-shara elimizde 1 naýryzda atap ótiletin Alǵys aıtý kúnine oraılastyrylǵan. Ony Baıqońyr aýdany ákiminiń apparaty men elordalyq Tótenshe jaǵdaılar departamenti uıymdastyrdy.
«Barshańyzdy 1 naýryz – Alǵys aıtý kúnimen shyn júrekten quttyqtaımyn! Búgin aýdanymyzdaǵy «Qutqarýshylar» alańyna jınalýymyzdyń sebebi – el ıgiligi úshin kásibı mindetin múltiksiz oryndaıtyn, qyzmette janqııarlyq tanytatyn mamandarǵa rızashylyq bildirý. Elimizde sońǵy jyldary bolǵan tabıǵı apattarda ár aımaqta qyzmet etetin tótenshe jaǵdaılar qyzmetkerleri mindetterine adaldyq tanytty. Shyn máninde, bul naǵyz erjúrek azamattardyń qyzmeti. О́zgelerdi qutqaramyn dep qaıtys bolyp ketken qutqarýshylar da az emes. Olardyń qatarynda elordalyq qutqarýshy Asqar Zabıkýlındi erekshe atap ótken jón. Batyrlardyń erligi eshqashan umytylmaýy kerek. Sonymen qatar jaqynda Túrkııada bolǵan jer silkinisine qutqarýshylar men dárigerler jiberildi. Syn sátte qutqarýshylarymyz birneshe adamdy aman alyp qaldy. Túrkııada kúndiz-túni qyzmet etken azamattarymyzǵa alǵys aıtamyz!», dedi Baıqońyr aýdanynyń ákimi Erlan Jaýlybaev.
Is-shara barysynda qyzmet barysynda qaza tapqan batyrlardyń rýhyna taǵzym retinde eskertkishke gúl shoqtary qoıyldy. Al elordalyq oqýshylar TJD qyzmetkerlerine alǵys retinde án shyrqap, fleshmob ótkizdi.
«Oqýshylar bizdiń batyrlarymyzǵa batyldyǵy úshin, kásibı boryshyn oryndaǵany úshin alǵys aıtýǵa keldi. Biz óskeleń urpaqqa erekshe kóńil bólemiz, óıtkeni balalar bizdiń bolashaǵymyz, olar tabıǵı jáne tehnogendik sıpattaǵy tótenshe jaǵdaılarda ózin qalaı ustaý kerektigin bilýi tıis. Ol úshin oqý oryndarynda túrli is-sharalar ótkizemiz. Onda biz úzdik oqýshylardy anyqtap, olardy estelik syılyqtarmen marapattaımyz», dedi qalalyq TJ departamenti bastyǵynyń orynbasary polkovnık Dastan Aldabekov.
Túrkııa elshisiniń kommýnıkasııalar jónindegi keńesshisi Mahmýt Shevket Baıram qazaqstandyq qutqarýshylarǵa alǵys bildirdi.
«Bizdiń elimiz úshin Qazaqstannyń kómekke umtylyp, qıynshylyqqa tap bolǵan túrik halqyna kómektesý úshin qoldan kelgenniń bárin jasaǵanyna qýanamyn. Baýyrlas halyqtan moraldyq, materıaldyq jáne fızıkalyq qoldaýdy seziný bizdi erekshe sezimge bóledi. Qazaq halqynyń bizben birge shyn júrekten qaıǵyryp, túrik halqynyń tutastyǵy men qaýipsizdigi úshin duǵa etkenin kórdik. Bizdiń elimiz bastan keshken apatty oqıǵalar Qazaqstan men Túrkııa arasyndaǵy dostyq qarym-qatynasty nyǵaıtýǵa yqpal etti. Qazaqstandyqtardyń eńbegine, kúsh-jigerine jáne ystyq nıetterine qarap, úlken rızashylyǵymyzdy bildiremiz», dedi elshiniń keńesshisi.
