Aımaqtar • 01 Naýryz, 2023

Jerge qatysty jaýapsyzdyq tyıylmaı tur

87 ret kórsetildi

Áýlıeata óńirinde jer qatynastaryna qatysty bylyqtyń beti ashylyp jatyr. Qolynda bıligi barda belden bas­qandardyń áreketi áshkere boldy. Bul týraly Sybaılas jemqorlyqqa qarsy is-qımyl agenttiginiń oblys boıynsha depar­tamenti basshysynyń mindetin atqarýshy Qýanysh Ahmetqa­lıev habarlady.

– Jer qatynastary salasynda jalpy baǵasy 238 mıllıon teńge somasyndaǵy 3,56 gektar jer ýchaskelerin zańsyz bergen Taraz qalasy ákimdiginiń laýazymdy tulǵala­ryna qatysty qylmystyq is aıaqtaldy. Sot sheshimimen jer ýchaskeleri memleket menshi­gine qaıtarylyp, oblys ákimdigi júrgiz­gen kelisim nátıjesinde, qaıtarylǵan jer ýchaskeleri mektep pen kóppáterli turǵyn úı qurylysyna beriledi. Atalǵan faktilerden basqa, memleketke aýyl sharýashylyǵyna ar­nal­ǵan 12 846 gektar jer ýchaskeleri qaıta­ryl­ǵanyn aıta ketken jón, – deıdi Q.Ahmetqalıev.

Departament tarapynan tıisti jumystar atqarylyp jatqanyna qaramastan, qylmystyq jaýapkershilikke tartylǵan jaýapty adamdar­dyń sany azaıar emes. Máselen, 2022 jyly 68 adam qylmystyq jaýapkershilikke tartylsa, onyń 16-sy túrli deńgeıdegi basshylyq qyzmette otyrǵandar eken.

– Qylmystyq isti tergep-tekserý aıaqtal­ǵannan keıin mindetti túrde Qylmys­tyq-pro­sestik kodekstiń 200-babyna sáıkes memle­kettik organdarǵa usynystar joldanady. Osyǵan baılanysty 2022 jyly memlekettik organdarǵa joldanǵan 59 usynys qaralyp, qaraý nátıjeleri boıynsha oblystaǵy ártúrli vedomstvonyń 35 qyzmetkeri tártiptik jaýapkershilikke tartyldy, – deıdi ol.

Aıtpaqshy, departament tarapynan jol­­da­natyn aqparattyq hattardyń keıbir má­se­lelerdiń aldyn alýda aıryqsha ról atqaratyny da belgili bolyp otyr. Hattyń der kezinde joldanýy arqyly birqatar kemshilik der kezinde qalpyna keltirilgen.

– Agenttik bıýdjet qarajatyn jymqyrý jáne sapasyz qurylys, jóndeý jumystarynyń aldyn alý maqsatynda memlekettik organdarǵa aqparattyq hattardy joldaý boıynsha vedom­stvolyq baqylaý algorıtmin bekitken. Máse­len, Turar Rysqulov aýdanynyń Qaraqat aýylyn­daǵy mektep ǵımaratyna kúrdeli jón­deý jumystaryn júrgizý kezinde sapasyz qurylys jumystary júrgizilgeni jáne atqarylmaǵan jumystarǵa 80,8 mıllıon teńge somasynda qarajat tólengeni anyqtaldy. Osyǵan oraı oblys ákimdigine atalǵan derek boıynsha shara qoldaný týraly aqparattyq hat joldandy. Osy nysan boıynsha jumys toby qurylyp, qysqa merzimde mekteptiń kúr­deli jóndeý jumystary aıaqtalyp, bıýdjet qarajatyn jymqyrýǵa jol berilmedi. Oqý úderisi der kezinde uıymdastyryldy, – deıdi ol.

Qalaı alyp qarasaq ta, óńirde quqyq buzýshylyqtyń azaımaı turǵany kimdi de bolsyn oılandyrmaı qoımaıdy. Baýyrjan Momyshuly týǵan óńirde: «Tártipke bas ıgen qul bolmaıdy, tártipsiz el bolmaıdy» degen batyrdyń sózine bas aýyrtatyndar az bolyp turǵany ókinishti.

 

Jambyl oblysy 

Uqsas jańalyqtar