Prezıdent tapsyrmasyn oryndaý maqsatynda Qostanaı oblysy ákimdigi janynan rezıdensııanyń qandaı maqsatqa qyzmet etetinin aıqyndaıtyn jumys toby qurylyp, qoǵam ókilderi men múddeli memlekettik organdardyń usynys-tilekterin tyńdap shyqqan.
Naýryz qarsańynda jumys toby aımaqtyq rezıdensııany psıhonevrologııalyq aýytqýǵa ushyraǵan jáne tirek-qımyl qozǵalysyna zaqym kelgen balalarǵa arnalǵan Saýyqtyrý ortalyǵyna beıimdeý týraly sheshim qabyldady. Jańa ortalyqta emge muqtaj balalarǵa arnaıy áleýmettik kómek kórsetilip, medısınalyq ońaltý, saýyqtyrý jumystary atqarylady. Em-shara qabyldaý merzimi 14 táýlikten 21 kúnge deıin uzartylady.
Buǵan deıin múgedektigi bar balalarǵa arnalǵan saýyqtyrý sharalary oblystyq ońaltý ortalyǵynda ǵana júrgizilip kelgen bolatyn. Mundaǵy balalarǵa arnalǵan bólimshe 2021 jyldyń qyrkúıeginde ashyldy. Oblys ákimdiginiń málimetinshe, 2022 jyly bul mekemede 191 bala 14 kúndik em-shara qabyldaǵan.
Jalpy oblys boıynsha psıhonevrologııalyq aýytqýǵa ushyraǵan, tirek-qımyl qozǵalysyna zaqym kelgen eki myńǵa jýyq bala bar.
Jańa Saýyqtyrý ortalyǵy jyl saıyn osyndaı dertke shaldyqqan 1,5 jastan 18 jasqa deıingi 900 balany emdeýge, reabılıtasııalyq qoldaý kórsetýge múmkindik bermek.
Atalǵan ortalyqta logoped, defektolog, reabılıtolog mamandar jumys isteıtin bolady. Sondaı-aq dene qurysyn jazý, emdeý maqsatyndaǵy dene shynyqtyrý, sýmen emdeý sııaqty qyzmetter kórsetiledi.
Rezıdensııany reabılıtasııalyq ortalyqqa aınaldyrý maqsatynda jergilikti bıýdjetten qarjy qarastyrylady. Bólingen qarajatqa ǵımaratty múmkindigi shekteýli balalarǵa beıimdeý, reabılıtasııalyq qural-jadyqtarmen qamtamasyz etý sııaqty jumystar atqarylady.
Bıyl ǵımaratty qaıta jabdyqtaý úshin jobalaý-smetalyq qujattarǵa tapsyrys berilip, qurylys-montajdaý jumystary bastalady.
