Kezdesý barysynda Andreı Lýkınniń depýtattyq saýalynda aıtylǵan usynystardy iske asyrý barysy týraly memlekettik organdardyń esebi tyńdaldy. Depýtat bas bostandyǵynan aıyrý oryndarynda dinı ekstremızmniń taralý problemalaryn kóterdi.
«Ekstremıstik ıdeologııanyń taralýy úshin bas bostandyǵynan aıyrý oryndary qunarly jer bolyp sanalady. Qoǵamnan oqshaýlanǵan sottalǵandar sol jerdegi tutqyndardyń senimdi sózderi men ýaǵyzyna ońaı kónedi. Keıbireýler din arqyly ómirdiń mánin túsinýge tyrysady. О́kinishke qaraı, olar radıkaldy dinı aǵymdardyń yqpalyna túsýi múmkin», dep atap ótti senator Andreı Lýkın.
Konstıtýsııalyq zańnama, sot júıesi jáne quqyq qorǵaý organdary komıteti depýtattarymen kezdesý barysynda QR IIM Qylmystyq-atqarý júıesi komıtetiniń ókili depýtattyq saýalda kórsetilgen usynymdardy oryndaý jóninde atqarylǵan jumystar týraly baıandama jasady. UQK Akademııasynda qaıta daıarlaýdan ótip jatqan teologtar úshin QAJ qurylymyna laýazym engizildi, al IIM Qostanaı akademııasynda sottalǵandarmen teologııalyq jáne ońaltý jumystaryn uıymdastyrý jónindegi penıtensıarlyq júıe qyzmetkerlerin daıarlaý ortalyǵy quryldy.
Bas prokýratýranyń ókili 2022 jyldyń qorytyndysy boıynsha radıkaldy kózqarastardy ustanatyn adamdardyń sany 4%-ǵa tómendegenin, sol arqyly 94 sottalýshy destrýktıvti ıdeıadan bas tartqanyn habarlady.
Depýtattar kezdesý barysynda sottalǵandardy radıkaldyq kózqarastan aryltý boıynsha olardyń áleýmettik baılanystaryn damytýǵa yqpal etetin, sol arqyly destrýktıvti dinı aǵymdardy jaqtaýshy adamdarǵa jaǵymdy áser etetin arnaıy baǵdarlamalar jasaý qajettigin atap ótti.
