Túrkııa Prezıdenti Rejep Taııp Erdoǵan óz quttyqtaýynda kóktemniń jarshysy – Naýryz Ortalyq Azııadan Balqanǵa deıingi alyp keńistikte toılanatyn ortaq dástúr men molshylyq meıramy ekenin atap ótken.
– Osy ortaq dástúrimizdi saqtaý jáne ony keıingi urpaqqa jetkizý maqsatynda jyl saıyn álemniń túkpir-túkpirinde toılanatyn Naýryz merekesi – dostyǵymyz ben baýyrlastyǵymyzdyń jarqyn kórinisi, – dep jazylǵan Túrkııa Prezıdentiniń jedelhatynda.
Tatarstan Raısy Rýstam Mınnıhanov ta baýyrlas tatar halqynyń atynan júrekjardy tilegin joldaǵan.
– Ejelden kele jatqan ári eshqashan eskirmeıtin, sondaı-aq ózine tán jańarý rýhyn, jasampazdyq qýaty men qýanyshyn ala keletin Naýryz merekesi qazaq-tatar halyqtarynyń damýyna, ózara yntymaqtastyǵynyń keńeıýine jol ashsyn dep tileımin, – dep jazylǵan jedelhatta.
Shanhaı yntymaqtastyq uıymynyń bas hatshysy Chjan Mın óz quttyqtaýynda Naýryz merekesinde dáripteletin tatýlyq, tabıǵatpen etene jaqyndyq jáne adamdar arasyndaǵy syılastyq kúlli adamzat balasynyń qundylyǵy ekenin aıtqan.
– Naýryz ShYU-ǵa múshe elder men halyqtardyń mádenı áralýandyǵyn saqtaýda jáne olardyń tatý kórshilik qarym-qatynasyn, dostyǵy men yntymaqtastyǵyn nyǵaıtýda mańyzdy ról atqarady. ShYU-ǵa múshe memleketterdiń belsendi atsalysýymen BUU Bas Assambleıasy Naýryz halyqaralyq kúni týraly qarar qabyldaǵanyn aıryqsha atap ótkim keledi. Bul osy meıramnyń jahandyq deńgeıdegi mańyzdylyǵyn bildiredi, – dep jazǵan uıymnyń bas hatshysy.
Sonymen qatar Memleket basshysyn Naýryz merekesimen Kavkaz musylmandary basqarmasynyń tóraǵasy, Sheıh-ýl-ıslam Allashúkir Pashazade quttyqtady.
