Mınıstrlik ókilderi habarlaǵandaı, qazir Almaty oblysyndaǵy dızel otynynyń qory 11 myń tonnadan asady. Janarmaı quıý stansııalary usynǵan derekterge qaraǵanda, búginde oblystaǵy dızel kólemi qajettilikti jabý úshin jetkilikti.
Degenmen, JQS jelileriniń aqparaty boıynsha búgin dızel otynyna degen suranys 30% astam mólsherge artqan. Sonyń saldarynan keıbir janarmaı quıý beketterinde otynnyń táýliktik kólemi tez taýsylyp qalǵan.
Mınıstrlik ókilderiniń aıtýynsha, óńirge dızeldiń qosymsha kólemi jóneltiledi.
«Sondyqtan jeliler basshylyǵy otyndy kóp tutynatyn aýdandarǵa tıep-jóneltýdi arttyrý týraly sheshim qabyldady. Sonymen qatar Atyraý munaı óńdeý zaýyty jáne Pavlodar munaı-hımııa zaýytynan 5 000 tonna otyn jóneltildi. «Qazaqstan temirjoly kompanııasy» ýaqtyly tasymaldaýdy qamtamasyz etedi», delingen vedomstvo habarlamasynda.
Buǵan deıin Shymkent munaı óńdeý zaýyty jóndeý jumystaryna baılanysty jabylǵan edi. Degenmen ol búgin jumysyn qaıta bastady. Atalǵan zaýytta óńdelgen munaı ónimderiniń alǵashqy legi demalys kúnderi jóneltiledi.
«Bul rette Almaty oblysyn qosa alǵanda, ońtústik óńirlerge birinshi kezekte jóneltý qamtamasyz etiledi. Sondaı-aq Almaty oblysynyń aýyl sharýashylyǵy taýaryn óndirýshilerine qosymsha 3 myń tonna dızel otyny bólinetin bolady», delingen habarlamada.
