Kezdesýdiń maqsaty – dostas memleketterdiń jańa jobalaryn júzege asyrý arqyly eki el arasyndaǵy baılanysty keńeıtý. Qazaqstandyq delegasııany Premer-mınıstrdiń orynbasary – Saýda jáne ıntegrasııa mınıstri Serik Jumanǵarın basqardy.
Ázerbaıjan – Qazaqstannyń Ońtústik Kavkazdaǵy negizgi saýda-ekonomıkalyq seriktesi. 2022 jyly eki memleket saýda-ekonomıkalyq saladaǵy ózara is-qımyldyń joǵary deńgeıin saqtady, osy kezeńde taýar aınalymy 461 mln dollardan asty. Bul rette taýar aınalymynyń ósýi 2021 jylǵa qaraı 39%-dy qurady, onyń ishinde eksport 30,4%-ǵa (287,9 mln dollardan 375,3 mln dollarǵa deıin), ımport eki esege jýyq (44,4 mln dollardan 86,6 mln dollarǵa) ósti.
Qazaqstanda Ázerbaıjan kapıtalynyń qatysýymen 1195-ten astam kásiporyn jáne 210 birlesken kásiporyn jumys isteıdi. Qazaqstan ekonomıkasyna salynǵan Ázerbaıjan ınvestısııalarynyń kólemi 365 mln dollardan asady.
Saýda-ekonomıkalyq yntymaqtastyq jónindegi Qazaqstan – Ázerbaıjan úkimetaralyq komıssııasynyń plenarlyq otyrysynda áriptesterin quttyqtaı otyryp, Qazaqstan delegasııasynyń basshysy, Premer-mınıstrdiń orynbasary – Saýda jáne ıntegrasııa mınıstri Serik Jumanǵarın qonaqjaılylyq tanytqan áriptesterine alǵysyn bildirip, elder arasyndaǵy ózara is-qımyl vektory Qazaqstan Prezıdenti Qasym-Jomart Toqaevtyń Ázerbaıjanǵa resmı sapary aıasynda 2022 jylǵy tamyzda qol qoıylǵan Saýda-ekonomıkalyq yntymaqtastyq týraly kelisimmen jáne yntymaqtastyqty damytýdyń 2022-2026 jyldarǵa arnalǵan keshendi baǵdarlamasymen aıqyndalatynyn atap ótti.
«Búgin biz Ázerbaıjan naryǵyna 304 mln dollardan astam somaǵa qazaqstandyq shıkizattyq emes taýarlardyń 110 túrin jetkizýdi pysyqtap jatyrmyz, olar metallýrgııa, munaı hımııasy, tamaq ónerkásibi, mashına jasaý, farmasevtıka, qurylys taýarlary ónimderi, olardyń dınamıkasyn turaqty negizde qadaǵalap, keıbir toptar boıynsha jaqsy ósimdi kórip otyrmyz. Ázerbaıjanǵa eksportty ulǵaıtý, onyń ishinde júk jáne júk-jolaýshylar kemeleri men paromdardy, relsterdi jáne basqa da daıyn ónimderdi jetkizý esebinen qamtamasyz etildi», dedi Serik Jumanǵarın.
Serik Jumanǵarın taýar aınalymynyń oń dınamıkasyna toqtala otyryp, Ázerbaıjanmen dástúrli eksport-ımport baptarynan basqa, qazir taýar aınalymy qurylymyndaǵy qazaqstandyq óńdelgen ónim úlesiniń kezeń-kezeńmen ulǵaıǵany baıqalyp otyrǵanyn erekshe atap ótti.
«Búgingi tańda Ázerbaıjan men Qazaqstan – kóptegen óńirlik, sondaı-aq iri transulttyq jobalardyń bastamashylary jáne belsendi qatysýshylary. Bizdi tereń tarıhı tamyry bar kópjyldyq yntymaqtastyq jáne tabysty tájirıbemen bekitilgen berik baýyrlastyq qatynastar baılanystyrady. Bizdiń elderimizdiń prezıdentteri – Ilham Geıdaruly Álıev pen Qasym-Jomart Kemeluly Toqaevtyń saıası erik-jigeriniń arqasynda ekijaqty ózara qarym-qatynastar sátti damyp keledi jáne ótken jyldyń tamyz aıynda Qazaqstan Respýblıkasy Prezıdentiniń Ázerbaıjanǵa sapary aıasynda olar Ázerbaıjan Respýblıkasy men Qazaqstan Respýblıkasy arasyndaǵy strategııalyq qatynastardy nyǵaıtý jáne odaqtastyq ózara is-qımyldy tereńdetý týraly Deklarasııaǵa qol qoıǵany kezdeısoqtyq emes», dedi Ázerbaıjan Respýblıkasynyń energetıka mınıstri Parvız Shahbazov.
Kaspıı teńizindegi sýaıryq jelisi boıynsha shekaralas elder bolǵandyqtan, Qazaqstan men Ázerbaıjan júk aǵyndarynyń tranzıttik baılanysyn qamtamasyz etý úshin udaıy kúsh salýda. Búgingi tańda Transkaspıı halyqaralyq kólik baǵyty (THKB) basym baǵyt jáne Azııanyń Eýropamen mańyzdy baılanysy bolyp tabylady.
Qazaqstan 2022-2027 jyldarǵa arnalǵan «Tar jerlerdi» sınhrondy joıý jáne orta dálizdi damytý boıynsha jol kartasy aıasynda belsendi jumys júrgizýde, Aqtaý porty bazasynda «konteınerlik hab» qurylysy, «Dostyq – Moıynty» ýchaskesinde ekinshi temirjol joldarynyń jáne «Almaty» stansasynyń aınalma temirjol jelisiniń qurylysy bastaldy, bul «Almaty» st. Qazaqstan –Qytaı kólik dáliziniń ótkizý qabileti aptasyna 24-ten 120 poıyzǵa, ıaǵnı 5 esege deıin jáne konteınerlik poıyzdardyń jyldamdyǵyn táýligine 1500 km-ge deıin arttyrý. Birlesken qujatta Aqtaý jáne Quryq porttarynda túbin tereńdetý jumystary josparlanǵan, parom flotyn damytý boıynsha sharalar qabyldanyp jatyr.
Kelissózder barysynda ózara yntymaqtastyq boıynsha kólik jáne tranzıt, logıstıka, energetıka, baılanys, aýyl sharýashylyǵy, birlesken óndiristerdi damytý, mádenı baılanystardy jandandyrý, týrızm jáne basqa da baǵyttardy damytý máseleleri talqylandy.
Úkimetaralyq komıssııanyń qorytyndysy boıynsha taraptar birlesken hattamaǵa qol qoıyp, saýda-ekonomıkalyq salada ekijaqty tıimdi jobalardy ilgeriletý boıynsha naqty ýaǵdalastyqtarǵa qol jetkizdi. Qazaqstandyq tarap «KazakhExport» ESK» AQ saqtandyrý ótemimen strategııalyq jobalardy birlesip iske asyrý salasyndaǵy kooperasııany keńeıtýge daıyn ekendigin bildirdi. Ázerbaıjan – Qazaqstan – Ázerbaıjan jáne Qazaqstan – Túrkııa/Eýropa –Qazaqstan baǵytynda Ázerbaıjan arqyly tranzıtpen ıntermodaldy temirjol júk tasymaly salasyndaǵy yntymaqtastyqty keńeıtý týraly ýaǵdalastyqqa qol jetkizildi. «Sıfrlyq Jibek joly» jobasy aıasynda Qazaqstan men Ázerbaıjandy baılanystyratyn Kaspıı teńiziniń túbi boıynsha talshyqty-optıkalyq baılanys jelilerin birlesip salý jobasyn iske asyrýdy jalǵastyrý týraly ýaǵdalastyqqa qol jetkizildi.
