Otyrysty ashqan Máýlen Áshimbaev, aldymen, Memleket basshysynyń elimizdiń áleýmettik-ekonomıkalyq damýy jónindegi keńeste bergen tapsyrmalarynan týyndaıtyn mindetterge toqtalyp ótti. Palata Tóraǵasy olardy iske asyrý úshin Senat Májilispen jáne Úkimetpen birlesip áreket etetinin aıtty.
«Memleket basshysy óńirlerdegi birinshi kezekte sheshýdi talap etetin máselelerge toqtalyp, oǵan Úkimettiń jáne jergilikti bıliktiń nazaryn aýdardy. Senat Prezıdentimiz belgilegen mindetterdi iske asyrýǵa qajetti zańnamalyq sheshimderdi Májilispen jáne Úkimetpen birlesip qabyldaıdy. Sondaı-aq aıtylǵan máselelerdi jumys barysynda basshylyqqa alyp, olardy Senattyń negizgi is-sharalar josparyn iske asyrý kezinde jan-jaqty eskeredi», dedi Máýlen Áshimbaev.
Otyrys barysynda senatorlar «Qazaqstan Respýblıkasynyń Úkimeti men Túrikmenstan Úkimeti arasyndaǵy Qazaqstan-Túrikmenstan memlekettik shekarasynyń rejımi týraly kelisimdi ratıfıkasııalaý týraly» zańdy qarap, maquldady.
Bul kelisim Qazaqstan men Túrikmenstan arasyndaǵy memlekettik shekaraǵa qatysty quqyqtyq qatynastardy retteýdi kózdeıdi. Atap aıtqanda, zań normalary arqyly memlekettik shekarany kútip ustaý, ony kesip ótý jáne shekara arqyly júkter men ózge múlikti ótkizý tártibi aıqyndalady.
Sondaı-aq qujatta memlekettik shekarada, shekaralyq beldeýler men sýlar sheginde kásipkerlik, balyq aýlaý nemese basqa da qyzmetti júrgizý, qoǵamdyq-áleýmettik is-sharalar ótkizý máseleleri qamtylǵan. Bul oraıda shekarada quqyqtyq turǵydan týyndaýy múmkin oqıǵalardy sheshý joldary da retteletinin atap ótken jón.
