Depýtat jemqorlyqpen kúresý jumystaryn kúsheıtý maqsatynda buryn bılikte bolǵan shendilerdiń dúnıe múlkin tekserýdi usyndy.
«Sybaılas jemqorlyq problemasy boıynsha aıtarym - «balyq basynan shirıdi». Biz kezinde joǵary bılikte otyrǵan azamattardyń aýzyn tyımaı, beri jaǵynan tyıý múmkin emes. Bul jerde jemqorlyq problemasy tek memleket pen onyń bıýdjetine ǵana baılanysty emes. Bul jerde bank júıesi de bar», dedi Májilis depýtaty Erlan Saıyrov telebaǵdarlama efırinde.
Ol sondaı-aq sybaılas jemqorlyq máselesinde jaqynda qabyldanǵan zańnyń qatań oryndalýy mańyzdy ekenin atap ótti.
«Bizde qaı ákimniń qandaı bıznesi bar ekenin búkil Qazaqstan biledi. Maǵan 30 jyl bıznespen aınalysyp kele jatqan azamat burynǵy mınıstrlerdiń qandaı úıi, dúnıe-múlki baryn aıtty, quny 1-1,5 mln turady dedi. «30 jyl bıznespen aınalysyp júrgen men ondaı úıdi ala almaımyn» deıdi. Meniń oıymsha, sol burynǵy mınıstrlerdiń tabysy men múlkin tekserý kerek. Qazir zań shyqty, eger memlekettik qyzmetker dúnıe-múlkin qalaı tapqanyn dáleldeı almasa, onda ony memleketke qaıtarýy tıis. Osy baǵytta jumysty kúsheıtý kerek», deıdi depýtat.
