Jezqazǵan – Elbasy nazaryndaǵy aımaq

Jezqazǵan, Sátbaev jáne Ulytaý aýdandaryn áleýmettik-ekonomıkalyq damytýdyń 2012-2020 jyldarǵa arnalǵan keshendi jospary óńirge jańa serpin beredi. Bul týraly Qaraǵandy oblysynyń ákimi Nurmuhambet Ábdibekov Jezqazǵanǵa jumys sapary barysynda málimdedi. Oblys basshysy jumys saparynyń basty maqsaty – Jezqazǵan, Sátbaev qalalary men Ulytaý aýdanyn áleýmettik-ekonomıkalyq damytýdyń 2012-2020 jyldarǵa arnalǵan keshendi josparynyń júzege asyrylý jaıymen tanysý boldy. Atalǵan josparda «Qazaqmys» korporasııasynyń mıneraldy-shıkizat bazasyn keńeıtý, shaǵyn jáne orta bıznesti damytý, turǵyn úıler men turǵyn úı-kommýnaldyq sharýashylyǵy nysandary qurylysyn salý, áleýmettik jáne kóliktik ınfraqurylymdardy damytý, tabıǵatty paıdalaný men qorshaǵan ortany qorǵaý, aýyl sharýashylyǵy aýmaqtaryn damytý máseleleri qamtylǵan bolatyn. Jumys sapary barysynda oblys ákimi óńirdegi eń iri óndiristiń biri – Ońtústik Jezqazǵan kenishinde boldy. Munda tórt iri shahta bar. Táýligine jospar boıynsha 22800 tonna ken, sondaı-aq, 148 tonna mys óndiredi. Kenishte 2200 adam jumys isteıdi. Shahtaǵa túsip, kenshilerdiń jumys jaǵdaıyn óz kózimen kórgen Nurmuhambet Qanapııauly jer astyndaǵy eńbekti uıymdastyrý barysyna óz rızashylyǵyn bil­dirdi. Korporasııa basshylarymen bolashaqta ken óndirýdiń kókjıegin keńeıtýge baǵyttalǵan is-sharalardy ortaǵa saldy. Kendi óńirdi damytýdyń keshendi jos­parynda belgilengen Jezqazǵan kentin, Vesovaıa, Krestovskıı jáne GRP eldi mekenderin kóshirýge qatysty máselelerdi talqylap, ol jerlerdi aralap kórdi. Oblys ákimi Jezqazǵan qala­synda jurtshylyqpen kezdesýde kóterilgen barlyq máselelerdi nazarǵa alyp, olardy sheshýge baılanysty sharalardy qaras­tyrý úshin orynbasarlaryna tapsyrmalar júktedi. Naqty jaǵdaılarǵa baılanysty tushymdy túsinikter berdi. Sonymen qosa, sapar barysynda N.Ábdibekov Jezqazǵan mys qorytý zaýytyna baryp, qazirgi jaǵdaıymen jáne jóndeý jumystarynyń kestesimen tanysty. Aımaqtaǵy ındýstrııalandyrý kartasyna engizilgen «Kaztehfıltr» JShS kásipornynyń jumysyn kórdi. Oblys basshysy qalalyq ákimdiktiń májilis zalynda Jezqazǵan, Sátbaev qalalarynyń jáne Ulytaý aýdanynyń áleý­mettik-ekonomıkalyq damý bary­syn talqylaǵan aktıv jınalysyn ótkizdi. Onyń jumysyna Par­la­ment Májilisiniń depýtattary Nurlan Jazylbekov pen Ar­man Qojahmetov, sondaı-aq, «Qazaq­mys» korporasııasynyń basshy­lary qatysty. Jınalysta ústi­mizdegi jyldyń bes aıynyń qory­tyndysyna jáne Úkimet qabyl­daǵan óńirdi damytýdyń 2012-2020 jyldarǵa arnalǵan keshen­di josparynda belgilengen min­detterge basa nazar aýdaryldy. Ákimderdiń esebin tyńdap, aktıv jınalysyn qorytyndylaǵan oblys basshysy óńirdi damytýdyń ózekti mindetterin atap kórsetti. – Jezqazǵan – keleshegi kemel aımaq. Elbasymyz Nursultan Nazarbaev óńirdiń áleýmettik-ekonomıkalyq damýyn árkez óziniń jiti nazarynda ustap keledi. О́ńirdi damytýdyń múmkindigi de mol. Tek onyń kózin taýyp, erekshe iskerlikpen jumys isteı bilý kerek. Aýqymdy sharalardy qamtıtyn keshendi jospar ekonomıkalyq jáne áleýmettik baǵytta odan ári damýdyń dańǵyl jolyna túsýde erekshe serpin bereri anyq. Sondyqtan, ol minsiz, múltiksiz oryndalýy tıis. Jumylǵan judyryqtaı bolyp áreket etsek, Jezqazǵannyń keleshegi kemeldene túsedi, – dep túıdi sózin N.Ábdibekov. Amandyq RAHULY, jýrnalıst, Aıqyn NESIPBAI, «Egemen Qazaqstan». JEZQAZǴAN.