Dástúr boıynsha saltanatty is-sharalar elordanyń ashyq alańdary men saıabaqtarynda uıymdastyrylyp, oǵan barynsha kóp adam qatysady.
Máselen, qalanyń shyǵarmashylyq ujymdary men ártisteriniń qatysýymen konserttik baǵdarlamalar Astananyń ártúrli aýdandarynda – Báıterek monýmentiniń alańynda, Beıbitshilik jáne kelisim saraıynyń janyndaǵy amfıteatrda, qalalyq alańda jáne Jazýshylar alleıasynda ótkizildi.
Jınalǵan jurtshylyqtyń aldynda memlekettik akademııalyq fılarmonııa ártisteri men otandyq estrada juldyzdary óner kórsetti, olardyń arasynda Gúlnur Orazymbetova, Almas Kishkenbaev, Jiger Aýpbaev, Dos, Álisher Kárimov, Qaırat Baekenov, Serik Ibragımov jáne basqalary bar.
Qala turǵyndary men qonaqtaryna arnap konsertter ǵana emes, ulttyq sport túrleri boıynsha jarystar da uıymdastyryldy.
«Qazaqstan halqynyń birligi kúni elimizdiń birtutas ekenin, al memleketimizdiń óz halqyna qamqor ekenin kórsetedi. Bul mereke oıyn-saýyq úshin ǵana emes, sonymen qatar oı júgirtip, tarazylaıtyn da ýaqyt.
Meniń oıymsha, bul bizdiń elimiz ártúrli mádenıetter men ult ókilderinen turatynyn jáne árqaısymyz onyń damýyna úles qosatynymyzdy bildiretin kún», dedi «Terra» bı teatrynyń solısi Alena.
Merekege tek elorda turǵyndary ǵana emes, qala qonaqtary da qatysady.
«Men úshin Qazaqstan halqynyń birligi kúni – barlyq ult ókilderi salt-dástúri men mádenıetin atap ótip, ózin úlken birtutas qoǵamdastyqtyń bóligi retinde sezine alatyn kún.
О́zim merekelik is-sharalarǵa barǵandy unatamyn, onda siz halyq ánderin tyńdap, túrli taǵamdardan dám tata alasyz, myń buralǵan bılerdi tamashalap, ulttyq kıimderdi de kóre alasyz. Bul elimizdiń qanshalyqty tatý-tátti ómir súrip jatqanyn bildiredi», deıdi mereke qonaǵy Aıgúl.
Astana qalasy Mádenıet basqarmasynyń mádenı-demalys qyzmetin uıymdastyrý bóliminiń basshysy Saltanat Mýksımova elorda turǵyndary úshin merekelik is-sharalar uıymdastyryp, keremet kóńil-kúı syılaýdyń mańyzdylyǵyn aıryqsha atap ótti.
«Qala turǵyndary konsertke óte belsendi qatysady. Olar qoshemetterin bildirip, tańdanystaryn jasyrmaıdy. Bul jerde «Jastar» saraıynyń solısteri óner kórsetedi. Sonymen qatar, bizdiń ártister qalalyq alańda, Báıterek monýmenti men jańa amfıteatrdyń janynda da óz ónerlerin pash etedi», dedi Saltanat Mýksımova.
