Memleket basshysynyń tapsyrmasy boıynsha balabaqshalardy, mektepterdi jáne basqa da oqý oryndaryn Shuǵyl áreket etý basqarmasynyń ortalyǵyna qosylǵan baqylaý kameralarymen, dabyl túımelerimen, sondaı-aq lısenzııalanǵan kúzetpen qamtamasyz etý úderisi jańa oqý jyly bastalǵanǵa deıin aıaqtalýǵa tıis.
Terrorızmge qarsy qorǵaýdy uıymdastyrý jónindegi nusqaýlyqqa sáıkes oqýshylar men personal sany 100 adamnan asatyn bilim berý nysandary beınebaqylaýmen jáne eskertý júıesimen jabdyqtalýǵa tıis. 300-den 700-ge deıin adam sany bar oqý oryndary Shuǵyl áreket etý basqarma ortalyǵyna qosylǵan dabyl túımeleri men kameralarymen jabdyqtalýǵa tıis, al 700-den astam adamǵa lısenzııalanǵan kúzet agenttikteri qyzmet kórsetýi kerek.
Alaıda keıbir aımaqtar belgilengen merzimge deıin úlgermeıin dep otyr. Mysaly, Almaty men Túrkistan oblystary aıtarlyqtaı artta qalyp, bul aımaqtarda kameralardy Shuǵyl áreket etý basqarma ortalyǵyna qosýǵa jáne kásibı kúzetpen qamtamasyz etýge qarjy bólý máselesi áli de ózekti.
«Balalar men jasóspirimderdiń qaýipsizdigin qamtamasyz etý – óte mańyzdy másele. Jańa oqý jyly bastalǵanǵa deıin, ıaǵnı 1 qyrkúıekke deıin barlyq óńir oqý oryndaryn tehnıkamen qamtamasyz etip, qajetti sharttar jasasýy kerek. Balalardyń qaýipsizdigi úshin jaýapkershilik bilim berý mekemeleriniń basshylaryna júktelýge tıis. Bul sharalar tekserýshi organdar úshin engizilmeıdi. Olar balalardyń múddelerin eskerip, olardy qorǵaýǵa baǵyttalǵan», dep atap ótti Altaı Kólginov.
Talqylaý qorytyndysy boıynsha vıse-premer jaýapty memlekettik organdarǵa ınjenerlik-tehnıkalyq jabdyqqa qoıylatyn talaptardy kúsheıtý bóliginde bilim berý nysandaryn terrorızmge qarsy qorǵaýdy uıymdastyrý jónindegi nusqaýlyqqa ózgerister engizý jóninde sharalar qabyldaýdy tapsyrdy. Budan basqa, ákimdikter mamyr aıynyń sońyna deıin oqý oryndaryn qaýipsizdik júıelerimen jabdyqtaýdy qarjylandyrý máselelerin sheshýi kerek.
Jasóspirimder qylmysy da ózekti bolyp tur. Bas prokýratýranyń málimetinshe, 2022 jyldyń qorytyndysy boıynsha kámeletke tolmaǵandar jasaǵan qylmys – 13,5%, aýyr qylmystar 36,5%-ǵa ósýi baıqalady.
Oqý-aǵartý mınıstrligi máselege áser etetin negizgi sebepter retinde ata-analardyń otbasyndaǵy tárbıe úderisinen alshaqtaýyn jáne ınternet-mazmunnyń teris áserin ataıdy. Býllıng jaǵdaılarynyń kóbeıýi úlken alańdaýshylyq týdyrady. Osyǵan baılanysty mektepterdegi psıhologııalyq kómek qyzmetin kúsheıtý, sondaı-aq mamandardyń kásibı biliktiligin arttyrý josparlanǵan.
Kámeletke tolmaǵandar arasynda qylmystyń ósýine jasóspirimderdiń bos ýaqytynyń tıimdi uıymdastyrylmaǵany da áser etedi.
«Kámeletke tolmaǵandar arasyndaǵy qylmystyń ósýi baıqalady, bul máseleni sheshý kerek. Jumysty júıeli jolǵa qoıý, balalardy sabaqtan tys is-sharalarǵa tartýdyń jańa formattaryn tabý, býllıngke qarsy is-qımyldyń halyqaralyq tájirıbesin zerdeleý, pedagogterdi otbasynyń áleýmettik portretin qurastyrý ádisterine oqytý baǵdarlamasyn ázirleý, balanyń mazasyzdyq deńgeıin anyqtaý boıynsha elektrondyq saýalnama júrgizý qajet», dep atap ótti vıse-premer.
Keńes qorytyndysy boıynsha Altaı Kólginov múddeli ortalyq jáne jergilikti atqarýshy organdarǵa birqatar tapsyrma berdi. Balalardyń quqyqtary men áleýmettik ál-aýqatyn qamtamasyz etýdiń 2023-2025 jyldarǵa arnalǵan Keshendi josparyn qabyldaýdy jedeldetý tapsyryldy.
