Bıyl bul baǵdarlamany nesıelendirýge 15,6 mlrd teńge jumsalady. Qajetti qarajatty Azııa damý banki (ADB) úshinshi transh aıasynda bólip otyr. Otbasy bank dál osy qarjy ınstıtýtymen birlesip, birneshe jyldan beri «Umaı» jobasyn sátti júzege asyryp keledi.
ADB sharttaryna sáıkes Astana, Almaty, Aqtaý jáne Atyraý qalalaryna zaemnyń jalpy kóleminiń 40% aspaıtyn bóligin nemese 200-ge jýyq nesıe bólý josparlanyp otyr.
Nesıeniń 60%-y oblystar men shaǵyn qalalardyń turǵyndaryna berilmek. Bul óńirlerdegi áıelder qaýymyn qoldaý jáne nesıeleýde dısproporsııany boldyrmaý maqsatynda jasaldy.
Genderlik teńdikti jetildirýge negizdelgen baǵdarlamany iske asyrýǵa ADB bas-aıaǵy 38 mlrd teńge kóleminde qarajat bólip otyr. 2021 jyly «Umaı» baǵdarlamasy bastalǵan kezde, birinshi transh aıasynda, jalpy kólemi 8,4 mlrd teńgege 954 qyz-kelinshek qaryz alǵan bolatyn. 2022 jyly 14 mlrd teńge bólindi. Bul qarajatqa 1 119 burymdy baspana alyp, qonys toıyn toılady.
Baǵdarlama boıynsha beriletin zaemnyń eń joǵarǵy quny 30 mln teńgege deıin. Paıyzdyq mólsherleme bıylǵy jyly 14,4% (JTSM - 15,4% bastap) teń, keıin ol 3,5%-5%-ǵa deıin (JTSM - 3,6% bastap) tómendetiledi.
«Umaı» baǵdarlamasy boıynsha qaryz alý merzimi – 6 aıdan 25 jylǵa deıin. Bul rette turǵyn úı tańdaýda shekteýler joq, ony alǵashqy jáne ekinshi naryqtan, sonyń ishinde úlestik qatysý sharttary boıynsha satyp alýǵa bolady. Sondaı-aq «Umaı» boıynsha baspanany jóndeý jumystaryna da 3,7 mln teńgege deıingi mólsherde qaryz alýǵa bolady.
Áleýetti qaryz alýshynyń aı saıynǵy otbasylyq tabysy 550 000 teńgeden aspasa, ol 15%-dyq bastapqy jarnamen nesıe ala alady. Al otbasynyń ortaq kirisi aıyna 550 001 teńgeden 640 000 teńgege deıingi aralyqta bolsa, onda turǵyn úıdi 20%-dyq alǵashqy jarnamen alýǵa bolady.
– «Umaı» baǵdarlamasy ekinshi nemese úshinshi turǵyn úı satyp alýdy kózdep otyrǵan, kirisi joǵary áıelderge arnalǵan. Bıylǵy jyly biz ADB-men birlesip, «Umaı» baǵdarlamasyna tabysy 200 000 teńgeden aspaıtyn áıelder de qatysa alady dep sheshtik. Eger olar tólem qabilettiligin rastasa, eń tómengi 15% bastapqy jarnamen nesıe alatyn bolady. Biz olarǵa bólingen qarajat aıasynda jalpy nesıelendirýdiń 20%-ǵa jýyǵyn bólýdi josparlap otyrmyz, dep túsindirdi «Otbasy bank» AQ basqarma tóraǵasy Lázzat Ibragımova.
«Umaı» baǵdarlamasy boıynsha nesıeni otbasybank.kz portalynda onlaın nemese bank bólimshelerinde jáne keńes berý ortalyqtarynda rásimdeýge bolady.
Búgingi kúni Otbasy bankinde 1,5 mln jýyq depozıt nemese belsendi jınaq shottarynyń jalpy kóleminiń 68% áıeldermen ashylǵan. Banktiń qaryz alýshylary arasynda da áıelderdiń sany basym (54,7%). Qyz-kelinshekterimizdiń páter nemese úı satyp alý úshin nesıe alatyn negizgi jasy 36-45 jas aralyǵynda. Ádette, nesıe merzimi – 10 jyl. Otbasy bankinde áıelder tólep otyrǵan nesıeniń ortasha somasy 11 mln teńgege teń.
