«Orbis Kazakhstan» kompanııalar tobynyń dırektorlar keńesiniń tóraǵasy Farrýh Mahmýdov pen EXEED International bas dırektory Chın Chao tehnologııalar týraly kelisimge qol qoıdy.
Almatynyń Indýstrıaldy aımaǵynda jańa zaýyt kesheni salynady. О́ndiristik qýaty jylyna 80 myń kólik shyǵaratyn kásiporynnyń qurylysy 2023 jyly bastalady. Kásiporyn EXEED ozyq tehnologııalary men zamanaýı tehnologııalyq jabdyqtardyń paıdalana otyryp, Qytaı avtomobıl ónerkásibi kóshbasshylarynyń standarttary boıynsha salynady. Jobaǵa salynatyn ınvestısııalar 72 mlrd teńgeni quraıdy. Birinshi kezeńde zaýyt kesheni halyqty 1500 jańa jumys ornymen qamtamassyz etýge múmkindik beredi.
Orbis Kazakhstan dırektorlar keńesiniń tóraǵasy Farrýh Mahmýdovtyń málimdeýinshe, bul kelisim Orbis Kazakhstan kompanııalar tobynyń damýyndaǵy mańyzdy kezeń boldy.
«Biz úshin bul kompanııa qyzmetiniń jańa kezeńi, sonymen qatar EXEED International kompanııasymen uzaq merzimdi jáne ózara tıimdi yntymaqtastyqqa daıyn ekenimizdiń kórsetkishi. Eldegi tartymdy ınvestısııalyq bıznes-klımat, sondaı-aq jergilikti óndiristerge memlekettik qoldaý kórsetý jáne saladaǵy memlekettik saıasattyń turaqtylyǵy biz úshin mańyzdy faktor ekenin atap ótemin. Biz Qytaıdyń avtokólik ónerkásibi kóshbasshylarynyń standarttary boıynsha joǵary tehnologııalyq óndiriske ınvestısııa jasaımyz. Ol zamanaýı tehnologııalar transfertine, salyq tólemderiniń ósýine, sondaı-aq jalaqysy joǵary jumys oryndaryn qurýǵa yqpal etedi. Bizdiń joba Qazaqstan men Qytaı arasyndaǵy ekonomıkalyq baılanysty nyǵaıtýǵa, sondaı-aq Qazaqstannyń avtomobıl ónerkásibin damytýǵa septigin tıgizetinine senimdimiz», dedi F.Mahmýdov.
Birinshi kezeńde qazaqstandyq kásiporyn EXEED markaly avtokólikterdiń úsh úlgisin shyǵarady, keıinnen brendtiń úlgiler jelisin keńeıtedi. Atap aıtqanda, tolyq gabarıtti VX jol talǵamaıtyn kóliginiń, TXL orta ólshemdi krossoveriniń jáne LX yqsham krossoveriniń shanaǵyn dánekerleý jáne boıaýmen birge tolyq sıkldi óndiris (CKD) iske qosylady.
Qazirgi tańda Orbis Kazakhstan-nyń enshiles kásiporny, Orbis Auto avtokólik toby Qazaqstanda EXEED dılerlik jelisin damytýda. Bul jeli arqyly shyǵarylǵan kólikterdi satý jolǵa qoıylady. 2025 jyly jańa kásiporynnyń konveıerinen Qazaqstanda jasalǵan tuńǵysh EXEED avtokóligi shyǵarylatyny aıtyldy.
