Kezdesý barysynda Ulttyq ǵylym akademııasynyń qyzmeti men aldaǵy josparlary talqylandy. Sondaı-aq ǵylym salasyna qatysty ózekti máseleler qozǵalyp, tushymdy oılar ortaǵa salyndy.
Qasym-Jomart Toqaev jańa mártebege ıe bolǵan Ulttyq ǵylym akademııasy otandyq ǵylymdy damytý isinde negizgi ról atqarýǵa tıis ekenin atap ótti. Prezıdenttiń pikirinshe, memlekettiń ǵylymı-tehnologııalyq jáne ekonomıkalyq saıasaty arasyndaǵy ózara baılanystyń nyǵaıýyna basa mán bere otyryp, ǵylymdy damytýdyń jańa tásilderin is júzinde qoldaný kerek.
Prezıdent otandyq ǵylymdy damytý úshin memleket qajetti jaǵdaı jasap jatqanyna nazar aýdardy. Prezıdent janyndaǵy Ǵylym jáne tehnologııalar jónindegi ulttyq keńes jumys isteıdi. Zertteý jumystaryn qarjylandyrý kólemi aıtarlyqtaı artyp, qarjylandyrý tetikteri jetildirildi. Bul rette Memleket basshysy qarjylandyrylyp jatqan ǵylymı jobalardyń ózekti ári suranysqa ıe bolýy, sondaı-aq ekonomıkanyń naqty sektorlarynda is júzinde qoldanylýy mańyzdy ekenin atap ótti.
Budan bólek, Memleket basshysy UǴA prezıdenti Kúnsulý Zakarıaǵa talantty ári jas ǵalymdardy ǵylymı ortaǵa tartý jóninde naqty tapsyrmalar berdi.
Kezdesý sońynda Qasym-Jomart Toqaev ǵylymı ıntellıgensııanyń elimizdi damytýǵa eleýli úles qosatynyn atap ótip, Ǵylym akademııasy prezıdentiniń jaýapty qyzmetine tabys tiledi.
