Indýstrııa jáne ınfraqurylymdyq damý mınıstri Marat Qarabaev aldaǵy jyldary 1 mln-nan asa otbasyn jańa baspanamen qamtamasyz etý josparlanyp otyrǵanyn aıtty. Qoıylǵan mindetke qol jetkizý úshin 2029 jyldyń sońyna deıin respýblıka boıynsha turǵyn úıdi paıdalanýǵa berýdi jyl saıyn 200 myń sharshy metrge arttyrý kózdelgen. Atap aıtqanda, bıyl 15,3 mln sharshy metr nemese 143 myńnan asa páterdi aıaqtaý josparlanyp otyr.
Sonymen qatar búginde respýblıka boıynsha úlestik qatysýy bar 44 problemalyq nysan bar. Mınıstrlik úlestik qurylys máselelerin retteý maqsatynda yntalandyrýshy jáne qatańdatatyn túzetýler paketin daıyndady.
Negizgi yntalandyrý is-sharalary qurylys salýshylarǵa qoıylatyn talaptardy jeńildetýdi kózdeıdi. Bul qurylys kompanııalaryna Qazaqstan turǵyn úı kompanııasynan kepildik jáne ákimdikterden ruqsat alý arqyly óz qyzmetin zańdastyrýǵa múmkindik beredi.
Qatańdatý is-sharalary úleskerlerdiń aqshasyn tartýdyń ashyq mehanızmin qalyptastyrýǵa baǵyttalǵan. Olardyń ishinde: salynyp jatqan turǵyn úıdi satyp alýǵa baılanysty barlyq shartty HQO-larda tirkeý, qurylysty odan ári toqtata otyryp, úleskerlerdiń aqshasyn zańsyz tartqany úshin aıyppul sanksııalaryn ulǵaıtý, úleskerlerdiń aqshasyn tartýǵa baǵyttalǵan ruqsatsyz jarnamaǵa tyıym salý jáne basqalar.
Sondaı-aq «Báıterek» UBH» AQ basqarma tóraǵasy Qanat Sharlapaev, Abaı oblysynyń ákimi Nurlan Uranhaev, Mańǵystaý oblysy ákiminiń birinshi orynbasary Jumabaı Qaraǵaev jáne Túrkistan oblysy ákiminiń orynbasary Nuralhan Kósherov baıandama jasady.
Premer-mınıstr Memleket basshysy 2029 jylǵa deıin 111 mln sharshy metr jańa turǵyn úı salý týraly mindet qoıǵanyn atap ótti. Atap aıtqanda, ótken jyly 130 myńnan asa otbasy baspana jaǵdaıyn jaqsarta aldy.
«Bul rette, jospar asyra oryndalǵan óńirlerdiń ishinde Astana, Almaty qalalaryn jáne Almaty oblysyn atap ótýge bolady. О́z kezeginde, Ulytaý, Soltústik Qazaqstan jáne Atyraý oblystarynda jospar oryndalmaı qaldy», dedi Álıhan Smaıylov.
Ol bıylǵy 4 aıdyń qorytyndysy boıynsha Abaı, Mańǵystaý jáne Ulytaý oblystary jospardan artta qalyp kele jatqanyn atap ótti.
Úkimet basshysy mundaǵy eń ózekti máseleniń biri qurylystyń jetkilikti deńgeıde ınjenerlik ınfraqurylymmen qamtamasyz etilmeýi ekenin atap ótti.
«Elorda qazir osyndaı problemaǵa tap bolyp otyr. Astanada energııa resýrstary jetispeıdi, sýmen qamtamasyz etý máselesi qatty sezilýde. Osyǵan baılanysty turǵyn úıdi paıdalanýǵa berýdiń josparlanǵan kólemi azaıtyldy. Basqa óńirlerde osyndaı jaǵdaılarǵa jol bermeý úshin barlyq ákimdik eldi mekenderdiń perspektıvalyq damýyna tıisti taldaý júrgizýi qajet», dep atap ótti Álıhan Smaıylov.
Ol kóbinese, josparlaý problemalary turǵyn úıdi paıdalanýǵa berý kezinde anyqtalatynyn, sondyqtan ınfraqurylym máselelerin jer ýchaskesin bólý jáne qurylysqa ruqsat berý kezinde sheshý kerek ekenin atap ótti.
Álıhan Smaıylov sondaı-aq keıingi ýaqytta halyq tarapynan qurylys jumystarynyń sapasyna jáne olardyń retsiz, beıbereket salynýyna, obektilerdiń ýaqtyly iske qosylmaýyna qatysty óte kóp shaǵym túskenin aıtty.
«Máselen, Astanada «Býdapesht» turǵyn úı kesheniniń turǵyndary byltyr qys bastalardyń aldynda jylýsyz qaldy. Shymkentte osydan bes jyl buryn ǵana memlekettik baǵdarlamamen salynǵan kóppáterli turǵyn úıdiń qabyrǵalary jarylyp, lıftileri jıi isten shyǵady. Almatyda taýly jerlerde, sýǵa jaqyn mańdarda jáne erekshe qorǵalatyn aýmaqtarda qurylys salý kezinde zańnamany buzýdyń 150-den asa faktisi anyqtaldy», dep atap ótti Premer-mınıstr.
Onyń aıtýynsha, ózekti problemanyń taǵy biri – qurylys kezinde ruqsat qujattarynyń bolmaýy. Almatyda salynyp jatqan «Tólebı Rezıdens» turǵyn úı kesheninde qurylysqa qajetti qujattar joq.
«Astananyń bir ózinde tıisti qujattary joq osyndaı 90-ǵa jýyq turǵyn úı kesheni salynyp jatyr. О́zderińiz biletindeı, sot qujatsyz salynǵan «Dýblın» turǵyn úı keshenin buzý týraly sheshim shyǵardy», dedi Álıhan Smaıylov.
Úkimet basshysy atap ótkendeı, Túrkııada bolǵan joıqyn jer silkinisinen de sabaq alýymyz kerek.
Jıyndy qorytyndylaı kele, ol turǵyn úı jáne ınjenerlik ınfraqurylymdy iske qosý boıynsha osy jylǵa arnalǵan barlyq jospardyń tolyq jáne ýaqtyly oryndalýyn qamtamasyz etip, joǵaryda aıtylǵan kemshilikterdi eskerý qajettigin atap ótti. Sondaı-aq bir aı merzimde kezekte turǵandar úshin úı bóle otyryp, keshendi qurylys salýdy qarjylandyrý mehanızmin iske qosý boıynsha is-sharalar qabyldaýdy jáne 1 qyrkúıekke deıin kezekte turǵandardyń tizimin belgilengen talaptarǵa sáıkestigi turǵysynan ózektendirýdi tapsyrdy.
