Atqarýshy komıtettiń bul usynysy 22 maýsymǵa josparlanǵan Halyqaralyq Olımpıada komıtetiniń kezekten tys otyrysynda qaralady. Sonymen qatar HOK 2024 jyly Parıjde ótetin Olımpııa oıyndaryna boksshylardyń qatysý tártibi men Halyqaralyq boks qaýymdastyǵyn (IBA) HOK quramynda qaldyrý-qaldyrmaý máselesin de qaraıdy.
Keıingi birneshe jyldan beri Halyqaralyq boks qaýymdastyǵy men Halyqaralyq Olımpıada komıtetiniń arasy salqyndap ketkeni belgili. Tipti jaǵdaıdyń ýshyqqany sonsha, HOK 2019 jyly IBA-ǵa 2020 jylǵy Tokıo Olımpıadasyna joldama beretin irikteý jarystaryn, Olımpıada kezindegi boks básekelerin uıymdastyrýǵa shekteý qoıǵan bolatyn.
HOK Halyqaralyq boks qaýymdastyǵyn «Barmaq basty, kóz qysty» áreketterge jıi baratynyn, tóreshilerdiń sybaılas jemqorlyqqa jol beretinin, sondaı-aq uıymnyń qarjylyq qyzmetinde ashyqtyq joq ekenin alǵa tartyp, aıyptap keledi. Tipti federasııa prezıdenttigine reseılik Ýmar Kremlevtiń kelýi, «Gazprom» kompanııasynyń uıymǵa demeýshi bolýy da HOK pen IBA arasyndaǵy qarym-qatynasty odan beter qıyndatyp jiberdi.
Al Reseıdiń Ýkraınaǵa basyp kirýi eki uıym arasyndaǵy shıelenisti múldem tyǵyryqqa tiredi. Máselen, 2022 jyldyń kókteminde HOK Halyqaralyq sport federasııalaryna Reseı men Belarýs sportshylarynyń jarysqa óz týlary jáne ánurany astynda qatysýyna shekteý qoıýdy usynǵan bolatyn. Barlyq federasııa HOK-tyń bul usynysyn buljytpaı oryndap keledi. IBA da alǵashynda HOK úkimine moıynsunǵanymen, 2022 jyldyń kúzinde HOK salǵan tyıymdy alyp tastap, Reseı jáne Belarýs sportshylaryna bıyl ótken erler jáne áıelder arasyndaǵy álem chempıonattarynda óz týynyń astynda óner kórsetýge ruqsat berdi. IBA-nyń bul sheshiminen keıin áýesqoı boksta jetekshi ról atqaratyn AQSh, Ulybrıtanııa jáne taǵy 17 eldiń boks federasııalary Tashkenttegi álem chempıonatyna qatysýdan bas tartyp, boıkot jarııalaǵan edi. Sóıtip, olar Halyqaralyq boks qaýymdastyǵynyń músheliginen shyǵyp, Dúnıejúzilik boks federasııasy (World Boxing) atty jańa uıym qurdy.
О́z kezeginde, IBA álemdik boks uıymyn saqtap qalýǵa jáne HOK-pen ara-qatynasyn jaqsartýǵa barynsha tyrysyp-aq jatyr. Jaqynda Halyqaralyq boks qaýymdastyǵy HOK tarapynan óz quqyqtaryn qalpyna keltirýge qoıylatyn barlyq talapty oryndaǵanyn málimdedi. Onyń ishinde eń negizgisi – uıymdy basqarýdaǵy, qarjy máselesindegi ashyqtyq, sondaı-aq tóreshilerdiń ádiletti sheshim qabyldaýyna jaǵdaı jasaý. Sonymen qatar IBA «Gazprommen» 2022 jyly aıaqtalǵan kelisimshartty ári qaraı uzartpaǵanyn, kiris kózderiniń ashyq málimetterin usyndy.
Eger HOK-tyń aldaǵy kezekten tys sessııasynda Halyqaralyq boks qaýymdastyǵyn uıym músheliginen shyǵaratyn bolsa, onyń ornyn bıyl sáýir aıynda qurylǵan «World Boxing» federasııasy ıelenip, 2024 jylǵy Olımpıadada boks básekelerin atalǵan federasııa ókilderi uıymdastyrýy múmkin.
Osylaısha, eki uıym arasyndaǵy «jekpe-jektiń» ekinshi raýndynda Halyqaralyq Olımpıada komıteti qarsylastaryn aýyr soqqymen bir márte eseńgiretip aldy. Munyń aldyndaǵy birinshi raýndta «boksshylardyń» kúshteri teń túsken bolatyn. Ekinshi raýndtan keıin HOK-tyń basymdyǵy baıqala bastady. Degenmen «jekpe-jek» áli de jalǵasady. Alda úshinshi raýnd bar.
