Qazirgi kezde órttiń jalpy aýdany 60 myń gektardan asady. Ony sóndirýge TJM, Qorǵanys mınıstrligi, IIM, ETRM jáne jergilikti atqarýshy organdardyń kúsh-quraldary jumyldyrylǵan.
Atap aıtqanda, 800-ge jýyq adam, 190 tehnıka jáne 8 tikushaq tartyldy. TJM derekterine saı, órt Talısa, Kashtak, Baryshevka, Ýspenka, Podnebesnoe jáne Kamyshenka eldi mekenderine qaraı úsh baǵytta taralyp jatyr.
TJ aýdanyn qalyń tútin basqanymen, joǵary betinde lapyldap janyp jatqan joq, oǵan aýa raıy jaqsy áser etti – túnde jáne tańerteń sirkirep jańbyr jaýdy.
Avıasııalyq tehnıka belsendi jumys istep jatyr. Oǵan qosa TJ ornyna qosymsha kúsh-quraldar tartylýda. Qatty órtenip jatqan ýchaskelerde tehnıka úzdiksiz jumys isteýi úshin sý jetkizilip otyrady.
Azamattar úshin ýaqytsha ornalastyrý oryndary jabdyqtalǵan. Eldi mekenderge tóngen qaýip seıildi. Jumys – baqylaýda.
Sonymen qatar qabyldanǵan sharalar týraly Abaı oblysynyń ákimi Nurlan Uranhaev, Qorǵanys mınıstri Rýslan Jaqsylyqov, Ekologııa jáne tabıǵı resýrstar mınıstri Zúlfııa Súleımenova baıandama jasady.
Premer-mınıstr Memleket basshysynyń tapsyrmasy boıynsha iri tabıǵı órtti joıý jáne azamattardyń qaýipsizdigin qamtamasyz etý úshin qajetti tehnıkalyq jáne adamı resýrstardyń barlyǵy jumyldyrylǵanyn atap ótti.
Sondaı-aq Álıhan Smaıylov qosymsha tehnıka men qyzmetkerlerdiń órt sóndirý oryndaryna jedel jetýin qamtamasyz etýdi talap etti.
Sonymen qatar Premer-mınıstr:
- Eńbek jáne halyqty áleýmettik qorǵaý mınıstrligine tótenshe jaǵdaıdan zardap shekken otbasylarǵa áleýmettik kómek kórsetý máselesin pysyqtaýdy;
- Densaýlyq saqtaý mınıstrligine qajet bolǵan jaǵdaıda azamattarǵa ýaqytyly medısınalyq kómek kórsetý máselesin baqylaýda ustaýdy;
- IIM-ge qoǵamdyq tártipti saqtaýdy jáne turǵyndar múlkin qaraýdy tapsyrdy.
