Eýropa fýtbol qaýymdastyqtary odaǵynyń (ÝEFA) erejesi boıynsha kári qurlyqtaǵy álem chempıonatynyń irikteý básekeleri bes satydan turady. Bul sońǵysy. Jerlesterimiz álem birinshiliginiń irikteýin negizgi kezeńnen bastady. Onda ÝEFA-ǵa múshe 36 eldiń quramasy úsh komandadan 12 topqa bólinip baq synady. Ár toptyń jeńimpazdary men ekinshi oryn alǵan eń úzdik tórt qurama tikeleı kelesi kezeńge shyqty. Al ekinshi orynǵa ıe bolǵan taǵy segiz komanda elıtaly kezeńniń tórt joldamasyn sarapqa saldy. Negizgi kezeńniń besinshi tobynda Slovenııa jáne Chernogorııa quramalarymen oınaǵan jerlesterimiz birinshi orynmen elıtaly kezeńge qınalmaı ótti.
Sóıtip, negizgi kezeńde iriktelip shyqqan 20 komanda elıtaly kezeńde tórt quramadan bes topqa bólindi. Ereje boıynsha ár toptyń jeńimpazdary kelesi jyly jalaýy jelbireıtin álem chempıonatyna tikeleı joldama alsa, ekinshi orynǵa ıe bolǵan eń úzdik tórt qurama taǵy eki joldama úshin bir-birimen elektik match ótkizedi. Jalpy, Eýropa aımaǵynan álem birinshiligine jeti qurama qatysa alady. Al eger álem chempıonaty Eýropanyń bir memleketinde óter bolsa (álem chempıonatyn qabyldaıtyn memleket áli anyqtalǵan joq), ekinshi oryn alǵan eń úzdik tórt qurama emes, eki qurama bir joldamaǵa talasady. Ekinshi joldama jarysty ótkizetin memleketke beriletini aıtpasa da túsinikti.
Elıtaly kezeńniń oıyndary osy jyldyń qyrkúıeginde bastalyp, jeltoqsanynda máresine jetedi. Jalpy, quramalar bul kezeńde bir-birimen úıde jáne syrt alańda bir-bir oıyn ótkizedi, jalpy alty týr oınaıdy. Iаǵnı 11-20 qyrkúıekte 1-2-týr, 2-1 qazanda 3-4-týr jáne 11-20 jeltoqsanda 5-6-týr oıyndary ótedi. Al elektik oıyndar 2024 jyldyń sáýir aıyna josparlanǵan.
Jerebe qorytyndysy boıynsha ózge toptarda myna komandalar oınaıdy: V tobynda – Ýkraına, Polsha, Serbııa, Belgııa, C tobynda – Horvatııa, Slovakııa, Fransııa, Germanııa, D tobynda – Ispanııa, Italııa, Slovenııa, Chehııa, E tobynda – qazirgi álem chempıony Portýgalııa, sonymen qatar Grýzııa, Armenııa jáne Fınlıandııa. Taǵy bir aıta keterligi, Armenııa men Germanııa quramalary Eýropa aımaǵynyń birinshi irikteý kezeńinen bastap sońǵy kezeńge deıin súrinbeı jetip otyr.
2021 jyly Lıtvanyń úsh qalasynda – Vılnıýs, Kaýnas, Klaıpedada ótken álem chempıonatynda Qazaqstan quramasy tabysty óner kórsetip, fınalǵa bir qadam qalǵanda súringen edi. Jerlesterimiz toptyq kezeńde Kosta-Rıka (6:1) men Lıtvadan (3:0) basym túsip, sońǵy týrda Venesýelamen teń (1:1) oınaǵan-dy. 1/8 fınalǵa óz tobynda birinshi orynmen shyqqan Qazaqstan quramasy alǵash Taıland fýtzalshylaryn jarys jolynan yǵystyrsa (7:0), shırek fınalda Irandy tize búktirdi – 3:2. Al jartylaı fınalda bolashaq álem chempıony Portýgalııamen teń oınap (2:2), match sońyndaǵy penaltı serııasynda ǵana ese jiberdi. Úshinshi oryn úshin ótken kezdesýde álemniń bes dúrkin chempıony Brazılııadan 4:2 esebimen jeńilip, álem birinshiligin tórtinshi orynmen túıindedi. Fınalda Portýgalııa quramasy 2016 jylǵy álem chempıony – Argentınany jeńip, jahandyq dodanyń bas júldesin jeńip aldy.
