«Salamatty Qazaqstan» medısınalyq poıyzy Shaqat stansasyna 13 maýsym kúni saǵat 02:03-te keldi. Densaýlyq kerýeni atalǵan bekette erteńgi qara keshke deıin turady. Sondaı-aq poıyz kestesine Pavlodar oblysynyń Krasnoarmeıka, Spýtnık, Tasqudyq, Maıqaıyń, Bozshakól, О́leńti jáne Torǵaı sııaqty stansalary engizilgen.
Esterińizge sala keteıik, poıyzdyń medısınalyq quramyna terapevt, hırýrg, jalpy tájirıbe dárigeri, nevropatolog, ýltradybystyq dıagnostıka dárigeri, akýsher, zerthanashylar, medbıkeler, rentgenolog, sáýlelik dıagnostıka dárigeri, stomatolog, otolarıngolog, psıholog, okýlıst, gınekolog jáne ýrolog kiredi. Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen alǵash ret azamattarǵa tıimdi psıhologııalyq, quqyqtyq jáne medıatıvtik (tatýlastyrý) kómek kórsetetin kásibı psıholog, medıator jáne zańger jumys isteýde. Budan basqa, azamattardyń memlekettik áleýmettik qoldaý alý, zeınetaqy, járdemaqy, áleýmettik tólemder jáne ataýly áleýmettik kómek alý quqyqtaryn qorǵaý máseleleri boıynsha tegin keńester ótkiziledi.
Jalpy, ShQO men Abaı oblysynda konsýltatıvtik-dıagnostıkalyq poıyzdyń dárigerleri 7 104 turǵyndy, onyń ishinde 1 031 balany qabyldady. Dárigerlerge qaralýdyń jalpy sany 1 9414. 550 shaǵyn hırýrgııalyq operasııa jasaldy.
Turǵyndar bolsa, bul múmkindikter úshin alǵys jaýdyrýda.
Sonymen poıyzdyń ár mamany munshama naýqasty qarap, em-dom jasady: jalpy tájirıbe dárigeri, terapevt, pedıatr – 1 665 adam; hırýrg – 2 282; ýrolog – 2 224; nevropatolog – 1 964; oftalmolog – 2 660; LOR – 1 425; akýsher-gınekolog – 739; stomatolog – 1 497; EKG – 952; ÝDZ – 2936; FLG – 412 jáne kardıolog – 108 adam.
Áıelder isteri jáne otbasylyq-demografııalyq saıasat jónindegi ulttyq komıssııanyń medıatory men zańgeri halyqty áleýmettik qoldaý máselesinde aýqymdy jumys atqardy – ShQO 10 shalǵaı stansa azamattarynyń 510 ótinishi qabyldanyp, 46 medıatıvtik kelisimge qol qoıyldy.
– 2013 jyly ajyrasqan, burynǵy kúıeýi alıment tólemeıtin áıeldiń jaǵdaıyn qaradyq. Onyń 3 kámeletke tolmaǵan balasy bar, qart ata-anasymen birge apatty 2 bólmeli páterde turady, kómek suraıdy. Men aýdan ákiminiń orynbasaryn shaqyryp, oǵan jalǵa beriletin turǵyn úıge kezekke turýǵa kómektesýin ótindim. Olar kómektesetin boldy. Onyń shaǵyn bıznesi úshin mádenıet úıindegi bólmeni jaldaý aqysynsyz usyndy. Kúzde páter bólinedi, deıdi kásibı medıator Janara О́sipbekova.
Sondaı-aq Abaı oblysynyń bes stansasynda 330 ótinish qabyldanyp, 32 medıatıvtik kelisim jasaldy (Semeı polıgony aýdanynda turatyn turǵyndar úshin áleýmettik járdemaqy bolmaýynyń máselesi – 48, memlekettik turǵyn úıge kezekke qoıý – 22, jyljymaıtyn múlik qujattaryn resimdeý – 31, grant boıynsha shaǵyn bıznes ashý – 55, múgedekterge járdemaqy alý – 18, alıment tóleý – 11, nesıeni keıinge qaldyrý – 35, jumys izdeý – 27, qoǵamdyq kóliktiń, aýrýhananyń, dárihananyń, jumystyń bolmaýy máselesi – 63 ótinish).
