Árige barmaı-aq úıińizden bes-alty adym bassańyz bolǵany, qyzý-qyzý qaınap jatqan qurylys, mańdaı ter, taza eńbekti kóresiz. Osynaý jankeshti eńbekqorlyqtyń arqasynda nebári 25 jylda elordamyz ózimiz túgili sheteldikter qyzyǵa qaraıtyn shahar búgin. Álemdik rýhanııat pen mádenıettiń ortalyǵyna aınalǵan qalada múmkindik kóp. Qalaǵa qonys aýdarýshylar sany jyl saıyn artyp keledi. Bastapqy sátte qala turǵyndary 200 myńdaı ǵana bolsa, búginde 1 mln 371 myń adam osy qalanyń turǵyny. Qala halqy ósken saıyn túrli qajettilik kólemi ulǵaıatyny anyq. Jaqynda ákim Jeńis Qasymbek qaladaǵy ózekti bop turǵan sý tapshylyǵy máselesin osy qala halqynyń artýymen túsindirgen edi.
«Qazirgi ýaqytta qalada táýligine 25 myń kýbometr sý jetispeıdi. Halyq sany kún sanap ósip jatyr. Jylyna kem degende 60-70 myń jańa turǵyn qosylady, al sońǵy 3 jyldyń ishinde qalamyzda turatyn azamattardyń sany 200 myń adamǵa artty», dep aıtqan edi jaqynda J.Qasymbek Instagram paraqshasynda.
Ákimdik sý máselesin retteý úshin osydan 2 jyl buryn eki jańa nysannyń qurylysyn bastady. Birinshi nysan – sorǵy stansııasy. Bul nysannyń qurylysy maýsym aıynyń sońyna deıin tolyǵymen bitedi. Nátıjesinde qalaǵa qajetti kúnine 25 myń kýbometr sý beriledi. Ekinshi nysan – Astana sý qoımasynan qalaǵa keletin sý qubyry. Bul nysandaǵy jumystar da aıaqtalýǵa jaqyn. Al tamyz aıynda stansııanyń ekinshi kezeńiniń qurylysy aıaqtalyp qalý kerek. Budan soń, qalaǵa kúnine qosymsha 85 myń kýbometr sý berile bastaıdy. Bul aldaǵy 3-4 jylǵa jetkilikti bolady.
Sondaı-aq Astana qalasynyń Investısııalar jáne kásipkerlikti damytý basqarmasy sý berý qubyryn salýdan bólek rekonstrýksııalaý jáne qubyrlardy tazalaý jumystary júrgizilip jatqanyn aıtty.
«Kóppáterli turǵyn úı keshenderinde sýdyń bolmaýy kóbinese ishki sýmen jabdyqtaý júıeleriniń, ıaǵnı, bitelgen súzgiler, rettelmegen sorǵy jabdyqtary, jabyq ysyrmalar jumysynyń buzylýymen de baılanysty bolýy múmkin», dep jaýap berdi vedomstvodaǵylar resmı saýalymyzǵa.
«Qystyń qamyn jaz oıla» degen támsildi eskergen ákimdik jylý berý máselesin de pysyqtap qoıǵan. Búgingi tańda qoldanystaǵy stansııalardaǵy jylý qýatynyń tapshylyǵy 432 Gkal quraıdy. Osy tapshylyqty boldyrmaý maqsatynda ákimdik qýattylyǵy 440 Gkal bolatyn JEO-3-tiń 1-kezeginiń jáne eki gaz jylý stansııasynyń («Ońtústik-Shyǵys» jáne «Turan» GTQ, jalpy qýattylyǵy 690 Gkal) qurylysyn jalǵastyryp jatyr. Atalǵan nysandar jylytý maýsymy bastalar ýaqytta iske qosylady. Bul qaladaǵy jylýmen jabdyqtaý tapshylyǵy máselesin boldyrmaýǵa múmkindik beredi. Jospar boıynsha 12 myń jeke menshik úıge gaz tartylady. Onyń ishinde 8 myńy gazǵa qosylǵan. Jalpy aldaǵy 3-4 jyl ishinde 15-20 myń úı gazǵa qosylady.
2023 jyldyń qańtar-mamyr aılarynyń qorytyndysy boıynsha, elordanyń negizgi áleýmettik-ekonomıkalyq kórsetkishteri oń ósimdi kórsetip otyr. Mysaly, jumys istep turǵan shaǵyn jáne orta bıznes sýbektileriniń sany 220,1 myń birlikti qurady, bul ótken jylǵy kezeńmen salystyrǵanda 25,2%-ǵa kóp. Jalpy aımaqtyq ónim kólemi 5,5%-ǵa ulǵaıǵan. Bul – 10 444,1 mlrd teńge. 2022 jyldyń qorytyndysy boıynsha negizgi kapıtalǵa salynǵan ınvestısııalar kólemi 1 446,8 mlrd teńge boldy, ósim - 12,7%. Al 2023 jyldyń qańtar-mamyr aılarynda negizgi kapıtalǵa salynǵan ınvestısııalar kólemi 427,6 mlrd teńgeni qurady, ósim 20,9% boldy.
Astana qalasy – qurylys sektorynda Qazaqstan boıynsha aldyńǵylar qatarynda. 2023 jylǵy qańtar-mamyrda qurylys jumystarynyń kólemi 152 mlrd teńgeni qurady. Bul ótken jyldyń kezeńimen salystyrǵanda 2,2% -ǵa artyq.
Túıindeı kelgende bunyń barlyǵy turǵyndardyń alańsyz ómir súrýi úshin jasalyp jatqan jumystar. Toǵyz joldyń torabyndaǵy qutty qalanyń áleýmettik hám ekonomıkalyq damý dańǵyly áli alda. Júıeli júrgizilgen jumystardyń nátıjesin kóretin ýaqyt ta alys emes. Táýelsizdigimiz ben tutastyǵymyzdyń tuǵyry, ult bolyp uıysýymyzdyń ustyny bolǵan Astanamyzdyń «Aıhaı 25-i» qutty bolsyn!
