Sportty damytý dıreksııasynyń málimeti boıynsha, jarystyń alǵashqy kúninde uıymdastyrylǵan komandalyq saıysta Qazaqstan erler quramasy úzdikter qatarynan kórinip, Azııa birinshiliginiń qola júldesine ıe boldy. Al sary qurlyq dodasynyń bas júldesi Japonııa quramasyna buıyrsa, kúmis medal Qytaı quramasynyń enshisinde ketti.
Kúnshyǵys eliniń ókilderi 2018 jylǵy Azııa chempıonatynda da komandalyq saıysta top jarǵan bolatyn. Bizdiń quramadan jarys jolyna Əlisher Jumahan, Artıom Zaharov, Dmıtrıı Noskov jáne Ramıs Dinmuhamedov shyqty. Olar 4 shaqyrym joldy 4:00.4 sekýnd ishinde júrip ótken.
Bıylǵy Azııa birinshiligine sary qurlyqta ornalasqan 30 eldiń eń úzdik velosportshylary qatysyp jatyr. Olardyń qatarynda 14 otandasymyz da bar. 2018 jyly dál osy Nılaıdaǵy ulttyq velodromda ótken qurlyq chempıonatynda Azııanyń 22 memleketiniń ókilderi júldelerdi sarapqa salǵan bolatyn.
