Prezıdent qazaq ádebıetin qoldaıtynyn jáne týyndylardyń oqyrmanǵa qoljetimdi bolýy keregin atap ótti. Sondaı-aq kitaptyń taralýyna jazýshylardyń ózderi de múddeli bolýy keregin aıtty.
«Jalpy, men Memleket basshysy jáne azamat retinde qazaq ádebıetin árdaıym qoldaımyn. Týyndylar oqyrmandarǵa qoljetimdi bolýy kerek dep oılaımyn. Al, jazýshylarymyzdyń shyǵarmalary halyq arasynda, ásirese, jastar arasynda suranysqa ıe bolýy kerek. Munyń bári – memlekettiń ǵana emes, jazýshylarymyzdyń da mindeti.
Oqyrman qaýym qalamgerlerden halyqqa rýhanı azyq bolatyn tyń dúnıeler kútedi. Jazýshylar odaǵy osy jumysqa uıytqy bolady dep senemin. Osyǵan baılanysty, men Mereke Qulkenovtiń «Qazaqstannyń Halyq jazýshysy» ataǵyn qaıtarý týraly usynysyn qoldaımyn. Bul ataq atyna – zaty saı, laıyqty, týyndylary arqyly halyq súıgen jazýshylarǵa ǵana berilýi kerek dep sanaımyn», dedi Prezıdent.
Sonymen qatar Prezıdent ulttyq kınonyń damýyna qatysty pikir bildirdi.
«Qazirgi zamanda el bolamyz desek, ekrandy da túzeýimiz kerek. Sebebi kıno qoǵamnyń sana-sezimine erekshe yqpal etedi. Elimizde kıno óndirisi jaqsy damyǵan dep aıtý qıyn. Jańa ǵana belgili óner qaıratkeri Azamat Satybaldy kıno salasyn damytý týraly tushymdy oı aıtty. Men qoldaımyn. Rasynda, búginde kıno salasynda daý-damaı kóbeıip ketti. Birneshe keleńsiz mysaldar bar», dedi Qasym-Jomart Toqaev.
