«Sizdiń saparyńyzdy asyǵa kúttik. Bul sapar Qazaqstan men Germanııa arasyndaǵy yntymaqtastyqtyń damýyna tyń serpin berý úshin óte mańyzdy. Germanııa – Qazaqstannyń Eýropalyq Odaqtaǵy negizgi seriktesteriniń biri. Túrli saladaǵy yntymaqtastyqty nyǵaıtý úshin qoldan kelgenniń bárin jasaımyz. О́zara yntymaqtastyǵymyzǵa, halyqaralyq uıymdardaǵy is-áreketimizge, sondaı-aq geosaıası jaǵdaıǵa qatysty kóptegen másele boıynsha egjeı-tegjeıli ári ashyq pikir almastyq», dedi Qazaqstan Prezıdenti.
Kelissózder barysynda saýda-ekonomıkalyq ytymaqtastyqty keńeıtý máselesine basa mán berildi. Germanııa – Qazaqstannyń Eýropalyq Odaqtaǵy mańyzdy saýda-ekonomıkalyq jáne ınvestısııalyq seriktesteriniń biri. Germanııanyń Ortalyq Azııa elderimen syrtqy saýdasynyń 80 paıyzdan astamy bizdiń elge tıesili.
Energetıka, óńdeý ónerkásibi, mashına jasaý, kólik jáne logıstıka, jańartylatyn energııa kózderi, sırek kezdesetin jer metaldaryn ıgerý jáne aýyl sharýashylyǵy salalary ekijaqty qatynastardyń mańyzdy baǵyttary sanalady. Osy rette Memleket basshysy nemis kompanııalaryn Qazaqstandaǵy jasyl energetıka salasyna ınvestısııa quıýǵa shaqyrdy. Atap aıtqanda, taraptar jasyl sýtegi óndiretin zaýyt qurylysyn bastaýdy quptady. Ony Svevind Energy nemis-shved kompanııasy júzege asyrady. Bul jobaǵa salynatyn ınvestısııa kólemi 50 mıllıard dollardy quraıdy.
Qasym-Jomart Toqaev Frank-Valter Shtaınmaıerdiń Aqtaý qalasyna saparyn quptaıtynyn jetkizdi. Germanııa Prezıdenti Mańǵystaý oblysynyń ekonomıkalyq mol áleýetimen tanysýdy josparlap otyr
«Mańǵystaý oblysyna barý týraly sheshimińizdi joǵary baǵalaımyn. Bul bizdiń iskerlik yntymaqtastyq salasyndaǵy jetistigimizdiń kórinisi dep sanaımyn. Bilýimshe, siz teńiz portyna da barýdy kózdep otyrsyz», dedi Prezıdent.
Kezdesý barysynda taraptar Transkaspıı halyqaralyq kólik baǵyty aıasynda ózara is-áreketterdi kúsheıtýge basa mán berdi.
Qasym-Jomart Toqaev Qytaı – Eýropa baǵdary boıynsha qurlyq jolymen tasymaldanatyn júktiń 80 paıyzy Qazaqstan arqyly ótetinin aıtyp, elimizdiń óńirlik habqa aınala bastaǵanyna aıryqsha nazar aýdardy. Memleket basshysynyń pikirinshe, Shyǵys pen Batys naryqtaryn jalǵaıtyn bul kólik-logıstıkalyq dálizdiń strategııalyq mańyzy zor. Byltyr osy baǵdar arqyly 1,7 mıllıon tonnaǵa jýyq júk tasymaldanǵan. Bul 2021 jylǵy kórsetkishten eki ese kóp.
Budan bólek, memleketter basshylary aýyl sharýashylyǵy, balamaly energııa kózderi salalaryndaǵy, arnaıy ekonomıkalyq aımaqtar men qarjy ınstıtýttary aıasyndaǵy yntymaqtastyqtyń perspektıvalaryn qarastyrdy.
Frank-Valter Shtaınmaıer Astanaǵa arnaıy shaqyrǵany jáne qazaq halqyna tán qonaqjaılyq kórsetkeni úshin Qasym-Jomart Toqaevqa alǵys aıtty. Ol shaǵyn quramdaǵy kelissóz tabysty ótkenin atap ótip, birlesken jobalardy júzege asyrý mańyzdy ekenin jetkizdi.
«Bizdiń ekijaqty qarym-qatynasymyzdyń jaǵdaıy týraly aıtqanyńyzdy rastaımyn. Biz dıplomatııalyq qarym-qatynasymyzdyń sońǵy 30 jylyna ǵana emes, sonymen qatar siz aıtyp ótkendeı, yntymaqtastyǵymyzdyń barlyq salada qarqyndy damyp kele jatqanyna nazar aýdaramyz. Nemis kompanııalary Qazaqstanǵa qomaqty qarajat quıyp keledi jáne bul baǵyt tek ekonomıkalyq salamen shektelmeıdi. Bizdiń Prezıdent myrzamen ustanymymyz ortaq jáne Qazaqstanda júrgizilip jatqan aýqymdy reformalarǵa úlken qurmetpen qaraımyz. Sizdiń jáne úkimetińizdiń sybaılas jemqorlyqqa qarsy is-qımyl júrgizip jatqandyǵy, ólim jazasyna moratorıı engizgeni, Konstıtýsııalyq sot qurǵany, Parlamentti nyǵaıtqany Germanııada málim. Meniń oıymsha, munyń barlyǵy búkil álemge belgili. Sondaı-aq Siz prezıdent retinde óz qyzmetińizdi bastaǵan kezde álemge jáne Qazaqstan halqyna jarııalaǵan baǵytyńyzdy ustanyp kele jatqanyńyzdyń dáleli», dedi Germanııanyń Federaldy Prezıdenti.
