Statıstıkaǵa kóz júgirter bolsaq, fýtboldan Qazaqstan ulttyq quramasy da, ishki chempıonatta dop tebetin komandalarymyz da buǵan deıin Ulybrıtanııa jerinde ótken birde-bir oıynda jeńiske jetpegen eken. Máselen, 2008 jyly bizdiń jigitter «Ýemblıde» Anglııa quramasynan – 5:1, 2019 jyly Glazoda Shotlandııadan 3:1 esebimen jeńilgen. Sondaı-aq Eýrokýbok básekelerinde baq synap júrgen «Astana», «Qaırat», «Shahter» komandalary ár jyldary Birikken Patshalyqtyń «Seltık», «Aberdın», «Manchester Iýnaıted» sııaqty klýbtarymen kezdesip, Brıtanııadaǵy barlyq oıynda alań ıeleriniń myqtylyǵyn moıyndaýǵa májbúr bolyp júr edi.
Osyndaı sátsiz oıyndar serııasynan keıin kóp jankúıer keshegi match aldynda jerlesterimiz teń nátıjege qol jetkizse, biz úshin óte táýir jetistik bolar edi dep boljam jasaǵan-tyn. Alaıda bizdiń fýtbolshylar jankúıerlerge úlken tosynsyı daıyndap qoıǵan eken. Belfasttaǵy 19 myń jankúıerge arnalǵan «Ýındzor Park» stadıonyndaǵy tartysty kezdesýde otandastarymyz Soltústik Irlandııa quramasymen jasyl alańda alǵash ret jolyǵyp tursa da, alań ıelerin sońǵy mınýtta san soqtyryp ketti. El quramasy sapynan kezdesýdegi jalǵyz ári jeńis golyn oıynnyń 88-mınýtynda Abat Aıymbetov soqty. «Astana» klýbynyń shabýylshysy dopty óz aımaǵymyzdan qabyldap, bir ózi qarsylas komandanyń úsh fýtbolshysyn ońaı aldap ótip, dopty Beılı Pıkok-Farrel qorǵaǵan qaqpaǵa dál baǵyttady – 1:0.
Osylaısha, Eýropa chempıonatynyń irikteý kezeńinde qatarynan úshinshi oıynda jeńiske jetken jerlesterimiz N tobynyń týrnır kestesinde toǵyz upaı jınap, Fınlıandııamen birge kósh bastady. Sýomı eliniń ókilderi bul týrda San-Marınodan 6:0 esebimen basym tústi. Al Danııa men Slovenııa bir-birimen teń oınap (1:1), jeti upaımen úshinshi jáne tórtinshi oryndarǵa ornalasty.
Magomed Adıev shákirtteri kelesi týr oıyndaryn kúzde óz alańymyzda Fınlıandııa (7 qyrkúıek) jáne Soltústik Irlandııa (10 qyrkúıek) fýtbolshylarymen ótkizedi.
