Sýretti túsirgen Erlan OMAR, «EQ»
Astana – Baıqońyr – Túrkistan – Almaty – Býrabaı – Astana baǵytymen saparǵa attanǵan balalardyń alǵashqy legin shyǵaryp salý rásimine «Samuryq-Qazyna» qorynyń basqarma tóraǵasy Nurlan Jaqypov, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen, Qor quramyndaǵy portfeldik kompanııalar basshylary, balalar jáne olardyń ata-analary qatysty.
«Búgin – biz úshin de, balalar úshin de tarıhı kún. О́ıtkeni elimizdiń bolashaǵy sanalǵan jas jetkinshekterimiz alǵash ret úlken saparǵa attanyp bara jatyr. Olar tabıǵaty tańǵajaıyp jerlerdi aralap, elimizdiń kórikti mekenderin kózben kórip qaıtady. Sondyqtan balalarǵa bul sapardan úlken áser alyp, demalystan kóp kúsh-jiger jınap qaıtyńyzdar dep tilek aıtqym keledi. Saparlaryńyz sátti bolsyn!», dedi Nurlan Jaqypov.
Lázzat Súleımen elimizde tarıhı oryndar men zamanaýı sáýletpen úılestirilgen tabıǵattyń biregeı eskertkishteri kóp ekenin aıta kelip: «Ushsa qustyń qanaty talatyn keń-baıtaq Otanymyzdyń kórnekti oryndaryna barý sizder úshin tarıhı jáne sáýlettik eskertkishterdi zertteýdiń jańa bastamasy bolatynyna senimdimin», dedi.
Saıahatqa attanǵandar arasynda Qazaqstannyń túkpir-túkpirinen «О́z óńirimdi órkendetkim keledi» shyǵarmashylyq baıqaýynyń jeńimpazdary, sondaı-aq «Samuryq-Qazyna» AQ kompanııalar tobynyń óndiristik kásiporyndary qyzmetkerleriniń balalary bar.
Jobanyń basty maqsaty – balalardyń tanymyn arttyryp, bolashaq mamandyqty tańdaýǵa baǵdarlaý, óz halqynyń mádenıetine, qorshaǵan ortaǵa qurmetin kúsheıtý deıdi uıymdastyrýshylar.
Máselen, Baıqońyr qalasynda balalar «Qorqyt ata» memorıaldyq keshenine baryp, ǵarysh aılaǵynyń murajaıymen tanysyp, zymyran maketin ushyryp kóredi. О́renderdiń tanymdyq saıahaty el kóleminde arnaıy baǵdarlama boıynsha jalǵasady.
