«Ońtústik-Shyǵys shaǵyn aýdanynyń (Almaty aýdany) turǵyndarymen kezdestim. Bul shaǵyn aýdanda 80 myńnan astam adam turady. Turǵyndar ınjenerlik jeliler, joldar, áleýmettik nysandar salý, abattandyrý, avtobýs sanyn arttyrý, ınternet sekildi ózge de máselelerdi kóterdi», dep jazdy Jeńis Qasymbek Instagram paraqshasynda.
Qala ákiminiń aıtýynsha, shaǵyn aýdandaǵy basty mindet – ınjenerlik jeliler men joldar salý, abattandyrý.
«Biz eń birinshi kezekte osy jumystardy oryndaımyz. Sondaı-aq Ońtústik-Shyǵysta mektep salynady. Balalardyń bos ýaqytyn tıimdi ótkizýi úshin arnaıy oryndar ashý mańyzdy ekenin eskere otyryp, aýlalar men qoǵamdyq keńistikter, sol sııaqty dene shynyqtyrý-saýyqtyrý keshenderin salamyz. Balalardy kóbirek qamtý úshin úsh jyl ishinde 15 Oqýshylar saraıyn salýdy josparlap otyrmyz. Olardyń beseýiniń qurylysy kúzde bastalady. Olardyń biri Ońtústik-Shyǵys shaǵyn aýdanynda ornalasady», dep qosty elorda ákimi.
Kezdesý barysynda 2023 jyly jalpy qala boıynsha 6 myńǵa jýyq áleýmettik páter, 11 mektep, 150-den astam aýla men qoǵamdyq keńistik salý, 400-ge jýyq jańa avtobýs alý josparlanyp otyr.
«Kóterilgen máselelerdi sheshý jumysy qolǵa alyndy. Shaǵyn aýdandar men eldi mekenderdi jumys kestesine sáıkes damytamyz», dep túıindedi Jeńis Qasymbek.
