Qazaqstannyń Ulttyq Olımpıada komıteti elorda turǵyndary men qonaqtaryna arnap sporttyq is-sharalar uıymdastyrdy. Aksııa aıasynda túrli oıyndar men estafetalyq jarystar, breık-danserlerdiń qoıylymdary jáne ártúrli jastaǵy balalar arasynda taekvondo men karateden saıystar uıymdastyryldy.
Qazaqstannyń ataqty sportshylary - 2012 jyly Londondaǵy oıyndardyń Olımpıada chempıony – boksshy Serik Sápıev, bokstan 2016 jylǵy Olımpıadanyń kúmis júldegeri Vasılıı Levıt, bokstan álem jáne Azııa chempıony Mereı Aqshalov jas sportshylarǵa sheberlik sabaqtaryn ótkizdi.
«Barsha qazaqstandyqtardy Halyqaralyq Olımpıada kúnimen quttyqtaımyn! Men osyndaı is-sharaǵa qatysyp otyrǵanyma qýanyshtymyn, jas sportshylardyń olımpıadalyq sportqa qyzyǵýshylyq tanytyp, chempıon bolýǵa umtylǵanyn, elimizdiń chempıondarymen kezdeskisi keletinin kórý biz úshin úlken qýanysh. Meniń oıymsha, óskeleń urpaq jyl ótken saıyn sportqa bet buryp keledi, «ustazdan shákirt ozar» deıdi emes pe?! Jas sportshylardyń bizden ozyp, júzden júırik atanýy úshin barymyzdy salamyz. Sport festıvali óte jaqsy ótti, óz basym jaǵymdy áser aldym. Osy qýanyshty bizben bólisýge kelgenderińiz úshin rahmet. Mereke qutty bolsyn», dedi Serik Sápıev.
Jas sportshylar Olımpıadalyq sport túrlerine arnalǵan vıktorınaǵa, sondaı-aq «kóńildi starttar» estafetasyna qatysty. Sondaı-aq árqaısysy óz bilimi men daǵdylaryn kórsetip, Qazaqstannyń Ulttyq Olımpıada komıtetiniń baǵaly syılyqtaryn utyp aldy.
«Elimizdiń barlyq turǵyndaryn Halyqaralyq Olımpıada kúnimen quttyqtaǵym keledi. Olımpıada kúni jyl saıyn toılanady. Osyndaı sharalarǵa qatysqan uldar men qyzdar chempıon bolýdy jáne jeńis tuǵyrynan Qazaqstan týyn jelbiretýdi armandaıdy. О́skeleń urpaqqa degen senimim mol jáne olardyń ata-analaryna balasynyń tańdaýyna qurmetpen qaraǵany úshin rızashylyǵymdy aıtqym keledi. Vıktorınalarǵa belsendi qatysqan balalardyń bilimge degen qushtarlyǵyna tántimin. Qazaqstanda sport qarqyndy damyp keledi, bul qýanarlyq jaǵdaı», dedi Vasılıı Levıt.
Ulttyq Olımpıada komıteti Halyqaralyq Olımpıada kúnin 30 jyl qatarynan ótkizip keledi.
