Alpys alty jastaǵy naýqastyń bas aýrýy jıilep, sońǵy jyldary aýrý saldarynan esin joǵaltyp, talyp qalýy qalypty jaǵdaıǵa aınalyp ketken. Muny naýqastyń jaqyndary eleýsiz qaldyrmaı, dárigerlerdiń kómegine júginedi. Naýqastyń shaǵymdary men jaǵdaıyn tereń zerttep, sırek kezdesetin dúnıejúzilik «Takaıasý» aýrýyn anyqtaǵan QR PIB MO aýrýhanasynyń bilikti dárigerleri álemdik tájirıbege súıene otyryp alǵash ret kúrdeli operasııa jasap shyqty.
Takaıasý – aorta qabyrǵasynda qabyný prosesi bastalatyn aýrý. Qabynýdyń saldarynan tinderde tyrtyq jáne byrysý paıda bolady. Bul tamyrlardyń bitelýine ákelip soǵady. Nátıjesinde basqa baratyn qamtamyrlardyń ótkizgishtigi tómendeıdi. Ony qalpyna keltirý úshin ashyq nemese jabyq túrdegi operasııa jasaýdyń álemdik tájirıbeleri jeterlik.
– Bizge kelgen naýqastyń mıǵa baratyn eń negizgi eki jaqty ishki uıqy arterııalary, sonymen qosa omyrtqalyq arterııalary tolyq bitelip qalǵan bolatyn. Bastaǵy qantamyrlar buǵana arterııasynan shyǵatyn moıyndyq baılam tamyrynan qorektenip júrgen. Bul jerde kardıohırýgterdiń de aralasýy qajet edi. Sebebi júrekten shyǵatyn aorta tamyryna blog ornatý josparlandy. Sheteldik áriptesterdiń tájirıbesin zertteı kele jáne ózimizdegi zamanaýı tehnıkalyq múmkindikti paıdalana otyryp Kardıohırýrgııa bólimshesiniń meńgerýshisi Álibek Toıbaevpen birlese alǵash ret «Takaıasý» dıagnozyna operasııa jasap shyqtyq. «Kelisip pishken ton kelte bolmas» degendeı, qazir naýqastyń jaǵdaıy jaqsy, bastaǵy aýyrsynýlar tarqaǵan, – deıdi neırohırýrg dáriger Islambek Musabekov.
Tamyrlardyń bitelýi jıi kezdesetin aýrý bolǵanymen, ony emdeý kúrdeli prosess. Sátti jasalǵan operasııadan keıin neırohırýrg pen kardıohırýrg dárigerler kelesi naýqastarǵa kómektesýge daıyn.
