Kombınat qyzmeti barlyq sanıtarlyq talaptarǵa saı jumys istep, mal soıý, et óńdeý talaptary saqtalyp, avtomattandyrylǵan júıe negizinde jumys istep jatyr. Munda aı saıyn 360 tonna et shyǵarylyp, 100 tonna et ónimi óndiriledi. Etten jasalatyn jartylaı fabrıkat ónimderi, delıkatester jáne as úıge qajet ózge de ónimder bar.
Kombınat dırektorynyń orynbasary Nurkeldi Úsenovtiń aıtýynsha, barlyq ónim QMDB-nyńhalal standartyna tolyq sáıkes keledi.
– Barlyq kúsh-jigerimizdi sapaly ónim óndirip, otandastarymyzǵa adal as usynýǵa jumsaımyz. Buǵan qosa, jergilikti jastardy jumyspen qamtyp, óskeleń urpaqqa kóp múmkindik jasap otyrmyz. Osy kúni kompanııada 140-qa jýyq adam eńbek etedi. Onyń 130-y – jergilikti turǵyndar. Joba tolyq kúshine engennen keıin 200-den astam azamatty jumyspen qamtýdy kózdep otyrmyz, – dedi ol.
Aıta keteıik, aldaǵy 5 jylda partııa Mańǵystaý oblysynyń saılaýaldy baǵdarlamasyn júzege asyrý aıasynda jyl saıyn keminde 15 ınvestısııalyq jobany, onyń ishinde aýyl sharýashylyǵy ónimderin, atap aıtqanda et, sút óndirý, sondaı-aq qus fabrıkasyn salý jobalaryn júzege asyrýǵa yqpal etedi. Jańaózende 500 bas iri qara malǵa arnalǵan bordaqylaý alańy, Munaıly aýdanynda taǵy osyndaı eki alań salynady.
Sondaı-aq oblystyq «Jer amanaty» komıssııasy zańsyz bólingen nemese paıdalanylmaı jatqan jerler men jaıylymdardy memleket menshigine qaıtarýǵa kúsh salady. Jyl saıyn orta eseppen 300 myń gektar jer qaıtarylady.
