Sezge Qazaqstan Respýblıkasy, Qyrǵyzstan Respýblıkasy, О́zbekstan Respýblıkasy, Mońǵolııa memleketi, Reseı Federasııasy, Qytaı Halyq Respýblıkasy, Vengrııa memleketteriniń ókilderi qatysty.
Atalmysh jıynǵa qatysýshylar at ústindegi kúresten (aýdaryspaq) Dúnıejúzilik Fedarasııasynyń resmı qurylǵany jóninde habarlady. Federasııanyń shtab páteri Almaty qalasy bolyp bekitildi. Sondaı-aq qatysýshy memleket ókilderi at ústindegi kúresten Dúnıejúzilik Federasııasynyń prezıdenti etip QR «Aýdaryspaq» federasııasynyń prezıdenti, «Atasu Group» kompanııasynyń basshysy Marat Jumandy saılady.
Sezge arnaıy qatysqan QR Ulttyq sport Qaýymdastyǵynyń prezıdenti Islambek Saljanov bul sharanyń mańyzdylyǵyna toqtaldy.
«Búgin elimizdiń ulttyq sport tarıhyndaǵy mańyzdy kúnderdiń biri. Ulttyq sportymyz Aýdaryspaq oıynyn álemdik dárejege kóterer sát týdy. Reseı, Qytaı, Mońǵolııa, Qyrǵyzstan, О́zbekstan, Vengrııa memleketterimen birlese Aýdaryspaq sportyn damytyp dúnıejúzine tanytatyn bolamyz!
Barshańyzǵa belgili, kelesi jyly elimizde V-shi Dúnıejúzilik Kóshpendiler oıyndary ótedi.
Kóshpendiler urpaǵy sanalatyn bizder bul sharany óte joǵary deńgeıde ótkizýimiz kerek.
Bul másele Memleket basshysy Qasym-Jomart Toqaevtyń da jiti nazarynda!
Kóshpendiler oıyndaryn tıisti dárejede ótkizý máselesinde Ulttyq sport Qaýymdastyǵy ózine qarasty federasııalarmen birlese júıeli jumystardy bastap ketti.
Búgingi Dúnıejúzilik Aýdaryspaq federasııasynyń qurylýy sonyń dáleli dep bilemin.
Osy oraıda, atalmysh sporttyń damýy men órkendeýinde tynymsyz eńbek etip júrgen QR «Aýdaryspaq» federasııasynyń prezıdenti Marat Juman myrzaǵa erekshe alǵysymdy bildiremin!», dedi Islambek Tóleýbaıuly.
О́z kezeginde at ústindegi kúresten Dúnıejúzilik Federasııasynyń jańa prezıdenti Marat Juman alda úlken jumystar kútip turǵanyn málimdedi.
«Búgin barshamyz Almatynyń tórinde asa mańyzdy sharaǵa jınaldyq.
Osy mańyzdy bas qosýǵa dástúrli at sportyn dáripteıtin elderden kelgen ókilderge, sondaı-aq, QR Ulttyq sport Qaýymdastyǵyna óz rızashylyǵymdy bildiremin.
Búgingi jıynymyz qazaq eli úshin, ulttyq sportymyz úshin tarıhı kún bolady. Álemniń alpaýyt birneshe memleketterimen birlesip at ústindegi kúresten Dúnıejúzilik Federasııasyn qurý arqyly biz ulttyq sportymyzdy jahanǵa pash etemiz degen úlken josparymyz bar. Bizdi alda úlken jumystar kútip tur. Bolashaqta Federasııaǵa múshe eldermen birlese atalmysh sporttyń damyp, órkendeýine kúsh salatyn bolamyz», dedi Marat Qojahanuly.
Sondaı-aq jıyn basynda biryńǵaı oıyn erejeleri bekitildi. Negizgi erejeler qazaqtyń ulttyq sporty aýdaryspaqtan alyndy. Odan bólek, sportshylardyń salmaq dárejeleri qabyldanyp, alda ótetin jarystardyń kúntizbelik jospary bekitildi. Halyqaralyq oıyndardy ádil ótkizý maqsatynda mindetti túrde VAR (beınebaqylaý) qoıylý mindetteldi.
Jıyn sońynda Qyrǵyzstan Respýblıkasynyń ókilderi jańa bekitilgen biryńǵaı oıyn erejeleri boıynsha alǵashqy álem chempıonatyn osy jyldyń qyrkúıek aıynda Ystyqkólde ótkizýdi usyndy. Bul bastamany qatysýshy barlyq elder biraýyzdan maquldady.
