Bıyl sot sheshimimen 5 býkmekerlik keńse jabyldy. Olardyń jumysy qoldanystaǵy zańnama normalaryna sáıkes kelmedi. Qazir taǵy 3 býkmekerlik keńsege qatysty lısenzııalardyń kúshin joıý jumysy júrip jatyr.
Mádenıet jáne sport mınıstrliginiń málimetine súıensek, vedomstvo túsindirý arqyly jáne sot tártibimen býkmekerlik keńselerdiń sanyn azaıtý boıynsha jumys júrgizedi. Mysaly, keıingi 3 jylda býkmekerlik keńseler 15 lısenzııany óz erkimen tapsyrdy.
Aıta ketsek, Qazaqstandaǵy oıyn bıznesi sýbektileriniń jalpy sany da kemip jatyr. Keıingi 5 jylda olar 2,5 ese azaıdy. Eger 2018 jyly 97 bolsa, bıyl olardyń sany 38 birlik boldy.
«Mádenıet jáne sport mınıstrligi býkmekerlik keńseler men oıyn bıznesiniń basqa da nysandarynyń zań normalaryn saqtaýyn muqııat qadaǵalaıdy. Máselen, 2023 jyldyń basynan mınıstrlik sot tártibimen oıyn bıznesi salasyndaǵy 7 lısenzııanyń qoldanylýyn toqtatty. Osyǵan uqsas taǵy 7 uıymǵa qatysty jumys atqarylyp jatyr. Sondaı-aq ınternette de monıtorıng júrgiziledi. Bıyl 3670 zańsyz onlaın-kazıno buǵattaldy», dedi QR Mádenıet jáne sport vıse-mınıstri Erjan Erkinbaev.
