Qazaqstan strategııalyq zertteýler ınstıtýtynyń (QSZI) málimetinshe, Murat Laýmýlın uzaqqa sozylǵan naýqastan keıin qaıtys boldy.
Murat Laýmýlın 1959 jyly Almatyda dúnıege kelgen.
Ár jyldary ol QazMÝ-de sabaq berdi, elimizdiń jetekshi ǵylymı mekemelerinde ǵylymı-zertteý jumystarymen aınalysty, Syrtqy ister mınıstrliginde jumys istedi, dıplomatııalyq korpýsta kóptegen jaýapty qyzmetterdi atqardy. Onyń ishinde Germanııa men Belarýs elderinde jumys istedi. 2018 jyldan bastap «Astana» halyqaralyq ǵylymı kesheniniń Eýropa jáne Amerıkany zertteý ortalyǵynyń jetekshisi qyzmetin atqardy.
Sonymen qatar Murat Laýmýlın - kóptegen marapattardyń ıegeri jáne kóptegen ǵylymı eńbekterdiń avtory.
«Laýmýlın Murat Turaruly búkil sanaly ómirin ǵylymǵa arnaǵan. Ol - ulttyq qaýipsizdik, syrtqy saıasat, Ortalyq Azııa geosaıasaty, Qazaqstannyń Batyspen qarym-qatynasy, AQSh-tyń Ortalyq Azııadaǵy strategııasy týraly ondaǵan monografııalar men júzdegen maqalalar jazǵan ǵalym. Onyń ishinde kásibı ǵylymı ortada moıyndalǵan 4 tomdyq «Dúnıejúzilik shyǵystanýdaǵy Qazaqstan jáne Ortalyq Azııa tarıhy» eńbegi bar. Murat Turaruly ǵylymda erekshe baǵyt – álemdik geosaıasattaǵy Ortalyq Azııany zertteý mektebin qalyptastyrdy jáne damytty. Murat Turarulynyń qaıtys bolýy Qazaqstannyń búkil sarapshylar qaýymdastyǵy úshin aýyr qaza», dep jazdy QazSZI.
