Is-sharaǵa ortalyq memlekettik organdardyń, «Atameken» UKP, iri salalyq ortalyqtar men qaýymdastyqtardyń basshylary, sondaı-aq BUU ókilderi qatysty.
Ekologııa jáne tabıǵı resýrstar mınıstri Zúlfııa Súleımenova osy attas Tujyrymdamany iske asyrý sheńberinde ótken 10 jyl ishinde ekonomıkanyń energııa syıymdylyǵy 2008 jylǵy deńgeıden 36,7%-ǵa qysqartylyp, JEK úlesi 4,5%-ǵa deıin jetkizilgenin baıandady. Sonymen qatar ormandardyń aýdany 5%-ǵa, al erekshe qorǵalatyn tabıǵı aýmaqtardyń úlesi respýblıka aýmaǵynyń 10%-dan astamyna deıin jetkizildi.
Sondaı-aq Qazaqstan kómirtegi beıtaraptyǵyna qol jetkizýdiń 2060 jylǵa deıingi strategııasy qabyldanǵannan keıin Tujyrymdamany ózektendirý sheńberinde 2030 jylǵa qaraı kommýnaldyq qaldyqtardy qaıta óńdeý jáne kádege jaratý kórsetkishin 40%-ǵa, al uzaq merzimdi perspektıvada – 2050 jylǵa qaraı 60%-ǵa deıin jetkizý josparlanyp otyr. Aýyldyq jerlerde ortalyqtandyrylǵan júıeni uıymdastyrý arqyly 2040 jylǵa qaraı halyqty qaldyqtardy jınaý jáne kádege jaratý qyzmetterimen qamtý 100%-ǵa jetýi tıis.
Bul rette kásiporyndarǵa eń úzdik qoljetimdi tehnologııalardy engizýdi yntalandyrý arqyly 2050 jylǵa qaraı ónerkásip qaldyqtaryn qaıta óńdeý jáne kádege jaratý úlesin 60%-ǵa deıin jetkizý josparlanyp otyr. Sonymen qatar qatty turmystyq qaldyqtar (QTQ) polıgondaryn qalpyna keltirý jáne jańadan salý boıynsha jumystar júrgiziletin bolady.
Jańartylǵan Tujyrymdamany iske asyrý sheńberinde atmosferaǵa lastaýshy zattar shyǵarýdy azaıtý, atap aıtqanda JEO-ny jańǵyrtý jáne gaz otynyna kóshý, erekshe qorǵalatyn tabıǵı aýmaqtardy jáne ósimdikter men janýarlardyń sırek kezdesetin túrlerin qorǵaý, sondaı-aq orman alqabyn keńeıtý esebinen sharalar qabyldanatyn bolady.
Aýyl sharýashylyǵy, energetıka jáne sý resýrstaryn basqarý salalarynda da ekologııaǵa qolaıly sharalardy iske asyrý josparlanǵan.
Premer-mınıstr «Jasyl ekonomıka» jalpy elimizdiń turaqty damýynyń mańyzdy quraldarynyń biri ekenin atap ótti. Osyǵan baılanysty Tujyrymdamada qoıylǵan maqsattar men ındıkatorlarǵa qol jetkizý Qazaqstan ekonomıkasynyń damý traektorııasyn aıtarlyqtaı ózgertýdi talap etedi.
«Osynyń nátıjesinde halyqtyń turmys jaǵdaıy, atmosferalyq aýanyń jaı-kúıi, qaldyqtardy basqarý, sý jáne jer resýrstaryn paıdalaný jaqsarady», dedi Álıhan Smaıylov.
Premer-Mınıstr Ekologııa mınıstrligine Tujyrymdamany ózektendirýdi jedeldetip, jobany 1 jeltoqsanǵa deıin Úkimet Apparatyna engizýdi tapsyrdy.
Otyrysta jańartylatyn energııa kózderin odan ári damytý boıynsha josparlar men qabyldanyp jatqan sharalar barysy talqylandy. Búgingi tańda respýblıkada jıyntyq qýaty 2 525 MVt bolatyn 132 JEK nysany jumys istep jatqany ataldy. Jańa nysandardy iske qosý josparly merziminen buryn júzege asyp keledi. Jalpy, 2027 jylǵa qaraı taǵy 6 720 MVt jańartylatyn generasııany engizý josparlanyp otyr.
Úkimet basshysy dástúrli jáne jańartylatyn energııa sektorlaryn úndestirýdiń, sondaı-aq úı sharýashylyqtary, shaǵyn jáne orta bıznes, sharýa qojalyqtary deńgeıinde shaǵyn JEK qondyrǵylaryn damytýdy yntalandyrýdyń mańyzdy ekenin atap ótti.
