Ol ol ma, Qazaqstanda taǵy bir qat másele bar. Qaǵaz degen... Elimizdiń qansha qamdansa da óz qaǵazyn óndire almaǵany ókinishti-aq! Alysqa uzamaı kóbine teriskeıdegi kórshimizden arbalaıtynbyz. Olardaǵy jaǵdaı da ońyp turǵan joq. Soǵysqa baılanysty matap tastaǵan san túrli sanksııanyń shyrmaýynan shyǵa alar emes. Sodan ba, qaǵaz baǵasy da myń qubylyp tur. Qymbattaǵan ústine qymbattap, baǵa ekesh baǵa da bir orynda baıyz tappaı álek. Osyndaı shaqta ózine júktelgen jumysty atqarýǵa tyrysqan Ásker Allaverdiuly jańa qyzmetke aýysqaly jatqany týraly da aıtylyp qaldy. Endigi tańdaý kimge túser eken dep topshylap úlgergenimizshe, Erbolat Qamen baýyrymyzdy tanystyrýǵa alyp keldi...
Basqa-basqa bul azamattyń «Egemenge» alabótendigi joq. Buǵan deıin de senip tapsyrǵan sol qyzmetti abyroıly atqaryp shyqqanyna – el-jurt kýáger. Tipti Erekeńniń erek basqarý stılin sol kezde-aq baıqaǵan áriptesteri ony álige deıin maıyn tamyza áńgimelep berýden jalyqpaıdy. «Jigitti jigerinen tany» demeýshi me edi, jaryqtyq babalarymyz. Tańdaý tap sol baıaǵy biliktilik pen bilimge, qarym men qabiletke qaıta túsken syńaıly. Al bul – berik bolattaı shyńdalǵan Erbolattyń bes saýsaqtaı biletin sharýasy. Qunttylyǵynyń ózi qyryq atanǵa júk bolatyndyǵyn qaıda qoıarsyz?
«Jas ta bolsa bas bolǵan» Erbolattyń «Astana aqshamyndaǵy» aıtýly kúnderin aýzynan tastamaıtyn aǵalarynyń biri – aq myltyq jýrnalıst Talǵat Batyrhan. Gazetke korrektor bolyp qabyldanyp, túbinde sonyń basshysyna deıin kóterilý ekiniń biriniń qolynan kelmeıtin ońaı sharýa bolmasa kerek. «Taǵdyr jazyp, talaı basshymen istes boldym, solardyń ishinde orny bólegi osy Erbolat edi» deýi de teginnen-tegin emes shyǵar.
Qalaı desek te, Erbolat Tilekqabylulynyń «Qazaq gazetterine» qaıta oralǵan qadamy qutty bolǵaı! Alash baspasóziniń abyroıyn aspandatyp, mártebesin myń san bıiktetedi degen senimniń kókiregimizge qaıta uıalaǵanyna biz de bek qýanyshtymyz!
