Is-sharada sóz alǵan QMG basshysy M.Myrzaǵalıev joba Memleket basshysynyń bıyl 9 naýryzda Batys Qazaqstan oblysyna jumys sapary barysynda bergen tikeleı tapsyrmasymen iske asqaly otyrǵanyn atap ótti. «Prezıdent halyq arasynda salamatty ómir saltyn nasıhattaý men jastar arasynda sportty dáripteýdiń aıryqsha mańyzyn únemi alǵa tartyp keledi», dep atap ótti M.Myrzaǵalıev.
– Kompanııamyz úshin bul – turaqty damý boıynsha alǵan mindetterimizdiń birin oryndaý ǵana emes, «QazMunaıGazdyń» basty qundylyqtarǵa – jaýapkershilik pen qoǵamǵa degen qamqorlyǵynyń kórinisi. Byltyrdyń ózinde ulttyq kompanııa qaıyrymdylyqqa – shamamen 13 mlrd teńge, óńirlerdiń áleýmettik damýyna 12 mlrd teńge bólgenin atap ótý kerek. Bul qarajatqa turǵyn aýdandar men qalanyń kórikti jerlerinde abattandyrý jumystary júrgizilip, mektepter men aýrýhanalar, sport alańdary men ózge de nysandar salynyp jatyr», – dep tolyqtyrdy ulttyq kompanııa basshysy.
Sport kesheni Oral qalasynyń 10-shaǵyn aýdanynda salynady. Jospar boıynsha onyń qurylysy 2024 jyldyń sońynda aıaqtalady.
Sport kesheninde túrli jarys ótkizýmen qatar, sportshylardyń jattyǵýyna da barlyq múmkindik jasalady. Ǵımarat ishinde júgirýge arnalǵan 150 metrlik jolaǵy bar, ıadro laqtyrý, bıiktikke, uzyndyqqa, syryqpen sekirýge, sadaq atýǵa arnaıy jabdyqtalǵan jeńil atletıka arenasy da salynady.
Atalǵan arenada 1 200 orynǵa arnalǵan trıbýna bolady. Sonymen qatar sport kesheninde 25 metrlik birneshe jolaǵy bar basseın salý, pnevmatıkalyq tır, jartasqa órmeleý alańyn, ústel tennısin, batýt, kúres jáne boks zaldaryn ashý josparda bar.
QMG Basqarma tóraǵasy merdigerlerge qarata aıtqan sózinde, qurylys sapasy udaıy baqylaýda bolatynyn, sebebi jergilikti sportshylardyń aldaǵy daıyndyǵy osy jumystyń sapasyna baılanysty ekenin atap ótti.
«Osy jerde boı kóteretin keshen naǵyz sport sańlaqtaryn, mıllıondaǵan janǵa úlgi bolatyn bolashaq chempıondardy tárbıelep shyǵaratynyna kámil senemiz. Zamanaýı arhıtektýralyq sheshimderdiń arqasynda keshen qalaǵa erekshe kórik berip, Oraldyń kóz tartar kórkem jerleriniń birine aınalatyny sózsiz», dedi QMG Basqarma tóraǵasy M.Myrzaǵalıev.
