Qasym-Jomart Toqaevqa 2023 jyldyń I jartyjyldyǵyndaǵy «Báıterek» holdıngi qyzmetiniń nátıjeleri, sonyń ishinde kásipkerlerdi, agroónerkásip keshenin qoldaý jáne halyqty turǵyn úımen qamtamasyz etý jónindegi bastamalardyń iske asyrylý barysy týraly baıandaldy.
Prezıdentke usynylǵan málimet boıynsha iri bıznesti qarjylandyrý kólemi 114,4 mlrd teńge. Holdıng «Damý» qory arqyly shaǵyn jáne orta bıznesti damytýdy belsendi qoldaıdy. Qor 15 myńnan astam kásipkerge qoldaý kórsetti.
Jyl basynan beri «Otbasy Banki» 29 myń otbasynyń baspanaly bolýyna kómektesken. Bank baspanany jalǵa berýdi sýbsıdııalaý baǵdarlamasyna da belsendi qatysyp keledi. Baǵdarlama aıasynda I jáne II toptaǵy múgedektigi bar adamdarǵa, múgedektigi bar balalardy, jetim balalardy tárbıelep otyrǵan otbasylarǵa jáne kópbalaly otbasylarǵa qaıtarymsyz memlekettik qoldaý kórsetildi. Birinshi jartyjyldyqta atalǵan baǵyt boıynsha 9 myńnan astam ótinim maquldandy.
Sondaı-aq «Agrarlyq nesıe korporasııasy» AQ arqyly jyl basynan beri 271 mlrd teńgeden astam qarjy bólinip, 9 myńǵa jýyq fermerge qoldaý kórsetilgeni týraly habarlandy. Bıyl 3,5 mln gektar jerge egin egildi. Bul – elimizdegi barlyq egis alqabynyń 15 paıyzy. Azyq-túlik qaýipsizdigin nyǵaıtý jáne ımportqa táýeldilikti tómendetý úshin aýyl sharýashylyǵyndaǵy ınvestısııalyq jobalardy nesıelendirýge 131 mlrd teńgeden astam qarajat bólindi. Agrarlyq sektordy qarjylandyrý kóleminiń 70 paıyzdan astamy «Agrarlyq kredıttik korporasııa» AQ men «QazAgroQarjy» AQ-ǵa tıesili.
Kezdesý sońynda Prezıdent bıznestiń ahýalyn jaqsartýǵa jáne áleýmettik turǵyn úı saıasatyn jetildirýge baǵyttalǵan naqty tapsyrmalar berdi.
