Kollajdy jasaǵan Qonysbaı ShEJIMBAI, «EQ»
Aıtalyq, bıylǵy III toqsanda Ekibastuz qalasynyń mańynda jylyna 240 myń tonna ferrosılısıı shyǵarýǵa qaýqarly aýqymdy óndiris ornynyń qyzmeti jolǵa qoıylady. Bul jyl saıynǵy eksporttyq tabysty shamamen 460 mln dollarǵa ulǵaıtýǵa múmkindik berip, 800 adamdy turaqty jumyspen qamtýǵa jol ashady. Jobanyń quny – 92 mlrd teńge.
Sondaı-aq bıyl otandyq ferroqorytpa óndirýshileri Qaraǵandy oblysynda ónimdiligi jylyna 400 myń tonna bolatyn arnaıy koks shyǵaratyn jańa zaýytty ashyp, ol alǵashqy ónimin shyǵara bastaıdy dep kútilip otyr. Bul ımporttyq úlesti jylyna 57 mlrd teńgege tómendetip, joǵary sapaly otyn túrine qol jetkizýge múmkindik beredi. 261 adamdy jumyspen qamtamasyz etýdi kózdeıtin bul jobanyń quny – 43 mlrd teńge.
Qostanaıdaǵy respýblıkalyq mashına jasaý ortalyǵy bıyl kommersııalyq júk kólikterine arnalǵan kópirlerdiń negizgi komponentterin óndirý boıynsha negizgi ónerkásip ortalyǵyna aınalmaqqa bet burdy. Zaýyt avtomattandyrýdyń joǵary dárejesimen erekshelenip, halyqaralyq ekologııalyq standarttarǵa tolyq saı keletinin jáne jergilikti oqý oryndarymen yntymaqtastyq ornatqanyn sóz arasynda aıta ketkenimiz jón bolar. О́ndiris iske qosylǵanda munda 300-ge deıin adam jumys isteıtin bolady.
2023 jyly otandyq avtomobıl ónerkásibindegi taǵy bir aıtarlyqtaı jańalyq – Qostanaıda Chevrolet Enix markaly avtokólikterdiń óndirisi júzege asyrylady. Naryqta qozǵaltqyshy 90 jáne 132 at kúshine teń sedannyń 2 túri jasap shyǵarý josparlanǵan. Soǵan saı jyl saıyn 30 myń kólik shyǵarý kózdelip otyr. Aýqymdy jobany iske asyrýǵa 23,4 mlrd teńge jumsalyp, 400 jumys orny qurylady.
Budan basqa Saran qalasynda turmystyq tehnıkany, Almatyda alıýmınıı radıatorlaryn, Qaraǵandyda jel generatorlaryna arnalǵan konýstyq munaralardy, Qostanaıda Jetour, Kia jáne SsangYong markaly kólikterdi, al Pavlodarda alıýmınıı dıskilerin óndirý josparlanǵan. Elimizde azyq-túlik qaýipsizdigin qamtamasyz etý úshin makaron ónimderi, sút jáne sút ónimderi, qus eti jáne taǵy da basqa óndiris oryndarynyń aýqymy keńeıtilmek.
Tutastaı alǵanda, 2023 jyly 13,2 myń turaqty jumys ornyn qurý mejelenip otyr.
