Foto: Úkimettiń baspasóz qyzmeti
Keńeske qatysýshylardyń nazaryna Mańǵystaý atom energetıkalyq kombınatyndaǵy (MAEK) jóndeý jumystarynyń barysy jáne jalpy Mańǵystaý oblysyn elektrmen turaqty túrde qamtamasyz etý boıynsha qabyldanyp jatqan sharalar týraly baıandama usynyldy.
Máselen, jedel is-sharalardy júzege asyrý sheńberinde jańa elektr jelileri nysandaryn salý arqyly Batys energetıkalyq aımaǵyn nyǵaıtý jónindegi jobany aıaqtaý josparlanyp otyr. Bul tutynýshylardy energııa qýatynan shektemeýge múmkindik beredi, óıtkeni MAEK energobloktary ajyratylǵannyń ózinde elektr energııasynyń tapshylyǵy Oral-Atyraý-Mańǵystaý tranzıti arqyly óteledi.
Sonymen qatar Mańǵystaý oblysynda elektr energııasyn tutynýdyń boljamdy ósimin eskere otyryp, birqatar uzaq merzimdi sharalar ázirlendi. Olardyń qatarynda 500 kV elektr berý jelisin salý arqyly Batys energetıkalyq júıesin Qazaqstannyń Biryńǵaı Energojúıesimen biriktirý, sondaı-aq Batys aımaqta jańa generasııalaý jobalaryn iske qosý bar. Másele bazalyq jáne manevrlik generasııalanatyn gaz stansalary jáne jańartylatyn energııa kózderine negizdelgen gıbrıdti stansalar salý týraly bolyp otyr. Sonymen qatar oblystaǵy jumys istep turǵan stansalarǵa da jańǵyrtý jumystary júrgiziletin bolady.
Premer-mınıstr Mańǵystaý oblysyna qajetti energetıka salasyndaǵy jobalardy iske asyrýdy jedeldetýdi jáne buryn josparlanǵandaı 2027-2028 jyldarǵa emes, nysanaly merzimder retinde aldaǵy 2024-2026 jyldarǵa baǵyttaýdy talap etti.
Sondaı-aq Álıhan Smaıylov tutynýshylardyń elektr jaryǵyn sóndirmeý úshin óńirdi elektrmen turaqty túrde qamtamasyz etý jumystaryn jyl sońyna deıin aıaqtaý qajettigin aıtty.
