Foto: Májilistiń baspasóz qyzmeti. Sýretti túsirgen S.Maılybaev.
Bıyl Qazaqstan men Eýropalyq Odaq dıplomatııalyq qarym-qatynastyń 30 jyldyǵyn atap ótýde. Aıgúl Quspan óz sózinde osy ýaqyt ishinde elimiz Eýropalyq Odaqtyń barlyq ınstıtýttarymen, sonyń ishinde Eýropalyq Parlamentpen tyǵyz baılanys ornatqanyn atap ótti.
«Qazaqstan Eýropalyq Odaqpen yntymaqtastyqty damytýǵa úlken mán beredi. Bizdiń strategııalyq seriktestigimiz nyǵaıyp keledi», dedi komıtet basshysy.
Devıd Makallıster Eýroparlament delegasııasynyń Qazaqstanǵa Ortalyq Azııa boıynsha baıandama-rezolıýsııasyn daıyndaý úshin kelgenin aıtty.
«Biz Prezıdent Toqaev júrgizgen saıası jáne áleýmettik-ekonomıkalyq reformalardy quptaımyz. Olardy odan ári júzege asyrý mańyzdy. Bizdiń oıymyzsha, Qazaqstan durys baǵytta kele jatyr. Konstıtýsııalyq reformalar sizdiń eldegi Parlamenttiń yqpalyn kúsheıtti», dedi Devıd Makallıster.
Eýroparlament sondaı-aq Eýropalyq Odaqtyń Ortalyq Azııa óńirimen yntymaqtastyqty tereńdetýine járdemdesýge nıetti. Kelissózge Májilis depýtattary Magerram Magerramov, Aıdos Sarym, Anas Baqqojaev, Marat Bashımov, Tańsáýle Serikov te qatysty. Eýroparlament delegasııasynyń quramynda Germanııa, Grekııa, Lıtva, Rýmynııa, Slovenııa jáne Horvatııa ókilderi boldy. Kezdesý qorytyndysy boıynsha taraptar partııaaralyq jáne fraksııaaralyq baılanystardy keńeıtýge kelisti.
