«Barshańyzdy kezekti sessııanyń ashylýymen quttyqtaımyn! Jaýapty qyzmetterińizge tabys tileımin!
Kóktemdegi saılaýdan keıin Parlamenttegi saıası partııalardyń qatary kóbeıdi. Depýtattar quramy aıtarlyqtaı ózgerdi. Saıası partııalardyń fraksııalary, bir mandatty okrýgtan saılanǵan depýtattar da jumysqa belsene kiristi. Olar kóptegen zań jobasyna bastamashylyq etip, ózekti máselelerdi batyl kótere bastady. Depýtattarymyz jazda da kóp jumys atqardy. Nebári eki aıda 1200-den astam eldi mekendi aralap, saılaýshylarmen kezdesti, turǵyndardyń tynys-tirshiligimen tanysty. Men barshańyzǵa tabysty qyzmetterińiz úshin shynaıy rızashylyǵymdy bildiremin. Jańa sessııada jumys qarqyny budan da joǵary bolady dep oılaımyn», dedi Memleket basshysy.
Prezıdenttiń aıtýynsha, jyl saıynǵy Joldaý jaqsy dástúrge aınaldy. Osy tusta Qasym-Jomart Toqaev bıylǵy Joldaýdyń aıryqsha máni bar ekenin atap ótti.
«Barshańyzǵa málim, men jyl saıyn halyqqa Joldaýymdy Parlament sessııasynyń ashylýynda jarııalaımyn. Búginde bul jaqsy dástúrge aınaldy. Munyń aıryqsha máni bar. Sebebi dál osy sátte jáne dál osy jerde bılik tarmaqtarynyń barlyq ókilderi bas qosady. Aldaǵy orta merzimdik jumystyń baǵyt-baǵdary aıqyndalady. Naqty tapsyrmalar beriledi, jańa mindetter júkteledi. Parlament, Úkimet jáne basqa da quzyrly organdar tyń qarqynmen iske kirisedi. Bir sózben aıtsaq, memlekettik apparattyń úılesimdi ári tıimdi jumys isteýi úshin bul is-shara óte mańyzdy. Búginde meniń bastamalarymnyń basym kópshiligi júzege asty. Birqatar jumys jalǵasyp jatyr», dedi Qasym-Jomart Kemeluly.
Eske sala ketsek, Joldaýdy www.akorda.kz resmı saıtynan, Facebook jáne Youtube jelisindegi Aqorda paraqshasynan tikeleı efırde kórýge bolady.
