Foto: ashyq derekkóz
«Sý únemdeıtin tehnologııalardy engizý – asa mańyzdy jáne shuǵyl mindet. Sondyqtan tıimdi tásilder usyný qajet. Degenmen biz dál qazirgi jaǵdaıda jańa tarıf saıasatynan da attap óte almaımyz. Ábden eskirgen ınfraqurylym áreń jumys istep tur. Sondyqtan jańa ınfraqurylym salý – óte mańyzdy mindet, qazirgi naryqtyń talaby», dep atap ótti Memleket basshysy.
Prezıdenttiń aıtýynsha, sýdy barynsha únemdeýimiz qajet, al ony normatıvten artyq jumsaǵandar aqysyn joǵary tarıfpen tóleýi kerek.
«Bir sózben aıtsaq, sýdy barynsha únemdeýimiz qajet. Oǵan qosa sýdyń «kóleńkeli» naryǵy túbirimen joıylýǵa tıis. Halqymyz «Sýdyń da suraýy bar» dep beker aıtpaǵan. Sý degenimiz – únemdep paıdalanbasa, tez taýsylatyn shekteýli resýrs. Onsyz sharýalardyń kúni qarań. Sol sebepti bul salada zańsyzdyqqa jol berilmeıdi. Talapqa baǵynbaıtyndar qatań jazaǵa tartylady. Elimiz úshin sýdyń mańyzy munaı, gaz nemese metaldan kem emes. Sý sharýashylyǵy júıesin tıimdi damytý máselesimen derbes mekeme aınalysýy qajet dep sanaımyn. Sondyqtan Sý resýrstary jáne ırrıgasııa mınıstrligi qurylady», dedi Qasym-Jomart Toqaev.
Joldaý barysynda Ulttyq gıdrogeologııa qyzmeti qaıta jumys isteıtini de belgili boldy. Sondaı-aq Prezıdent Qazaqstannyń sý sharýashylyǵyn basqarý júıesine túgel reforma jasalatynyn qosa aıtty.
«Mınıstrliktiń aıasynda Ulttyq gıdrogeologııa qyzmeti qaıta jumys isteıtin bolady. Elimizdiń sý sharýashylyǵyn basqarý júıesine túgel reforma jasalady. «Qazsýshar», «Nura toptyq sý qubyry» jáne basqa da negizgi kompanııalarda ózgeris bolady. Jalpy, osy salanyń materıaldyq jaǵdaıyn jaqsartyp, kadr máselesin sheshý kerek. Sý tapshylyǵynyń artýy – Ortalyq Azııa memleketterine ortaq másele. Sýdy únemdep paıdalaný energetıka nemese kólik salasy sııaqty aımaqtaǵy yntymaqtastyqtyń taǵy bir jańa baǵytyna aınalmaq. Úkimetke kórshi eldermen birlesip, bul máseleni jan-jaqty pysyqtaýdy tapsyramyn», dep túıindedi Memleket basshysy.
