«Sý resýrsy elimizdegi ózekti máselelerdiń biri. Ásirese, sýdyń sapasy jáne onyń halyqqa qoljetimdi bolýy asa mańyzdy bolyp tur. Jyl ótken saıyn halqymyzdyń sany da, ekonomıkamyz da ósedi. Bul – qalypty qubylys. Sol sebepti 2040 jyldarǵa qaraı Qazaqstandaǵy sý tapshylyǵy 12-15 mıllıard tekshe metrge jetýi múmkin. Jalpy, biz – transshekaralyq sý kózderine táýeldi elmiz. Eýrazııa qurlyǵyndaǵy ózender men kanaldar – barshamyzǵa ortaq tabıǵat baılyǵy. Osy sý kózderi bizdiń halyqtarymyzdy, ekonomıkamyzdy jaqyndastyrady», dedi Memleket basshysy.
Onyń aıtýynsha, kórshiles ári dostas eldermen bul másele boıynsha árdaıym ózara túsinistikke jáne kelisimge kelý kerek. Jan-jaqty oılastyrylǵan sý saıasatyn júrgizý, transshekaralyq sýlardy paıdalaný máselelerin sheshý – Úkimettiń aldynda turǵan asa mańyzdy mindetter.
«Sharýalar men ónerkásip ókilderine sýǵa qatysty sapaly saraptamalar men boljamdar kerek. Bul taldaýlar ár jyly jáne orta merzimdi kezeńde sýdyń mólsheri qandaı bolatynyn da qamtýy qajet. Sondyqtan bárin aldyn ala josparlaǵan jón. Sondaı-aq ishki sý resýrstaryn únemdep paıdalaný óte mańyzdy. Sýdy únemdeıtin tehnologııa óte baıaý engizilýde. Sýdy shaqtap paıdalaný mádenıeti de joq. Elimizdiń keıbir óńirlerinde sýdy eń kóp jumsaıtyn aýyl sharýashylyǵy salasynda onyń 40 paıyzy bosqa ysyrap bolyp jatyr. Sý sharýashylyǵy nysandarynyń 60 paıyzy tozyp tur. Olqylyqtyń ornyn toltyrý úshin óte batyl jáne shuǵyl sharalar qajet», dedi ol.
Osy rette Prezıdent eń aldymen, sýdy únemdeıtin ozyq tehnologııany engizý isin tezdetip, ony qoldaný aýmaǵyn jyl saıyn 150 myń gektarǵa deıin keńeıtý kerek ekenin aıtty.
«Kóktemgi qarǵyn sýdy jınaý jáne ony egistikke jetkenshe qumǵa sińirip joǵaltyp almaý máselesi sheshimin tabýǵa tıis. О́ıtkeni onyń bári – ishki sý qorymyz. Ol úshin 20 jańa bógen salý, keminde 15 sý qoımasyna kúrdeli jóndeý júrgizý jáne 3500 shaqyrymdyq kanaldy jańǵyrtyp, sıfrlyq tásilmen baqylaýǵa alý kerek. Negizgi mindet – 2027 jylǵa qaraı qosymsha eki tekshe shaqyrym sýǵa qol jetkizý», dedi Qasym-Jomart Toqaev.
