«Memlekettik qoldaý sharalaryn óndiristiń tehnologııalyq kúrdeliligine jáne bıznestiń naqty túrine qaraı jikteý mańyzdy. Onyń operasııalyq tıimdiligi joǵary bolýy da óte mańyzdy. Sondyqtan «Báıterek» holdınginiń qurylymyn ózgertip, ony keń aýqymda sıfrlandyrǵan jón. Eksportty ulǵaıtýǵa aıryqsha mán berý kerek. Onyń ádis-tásilderi bolǵanymen, júıeli ustanym joq», dedi Prezıdent.
Osy oraıda ol KazakhExport kompanııasy eksportty damytatyn tolyqqandy ınstıtýtqa aınalatynyn aıtty. Kompanııaǵa osy mindetti atqarýǵa qajetti quzyret beriledi.
Budan bólek, Memleket basshysy «Otbasy banktiń» qyzmetin qaıta qaraý kerek ekenin aıtty. Basty nazar oblys ortalyqtaryna emes, aýdandarǵa, mono-qalalarǵa jáne aýyldarǵa aýdarylady.
«Básekelestik damymasa, bıznes te órkendemeıdi. Bul – aıdan anyq. Qazir negizgi salalardyń kóbinde birneshe iri kásiporyn basymdyqqa ıe bolyp otyr. Bul jaǵdaı naryqtaǵy shynaıy ahýaldy kórsete almaıdy», dedi Q.Toqaev.
