Foto: iba.sport
– Aldymen júktemeden bastasaq. Federasııa basshylyǵy, mınıstrlik Qytaıda ótetin jazǵy Olımpıada oıyndarynan neshe joldama alýdy tapsyrdy?
– «Aryq sóılep semiz shyq» deıdi bálen salmaqta chempıon bolamyz, túgen boksshymyz joldama alady deýden aýlaqpyn, bárin rıng áıgileıdi. Biz tek barynsha tyńǵylyqty daıyndyqty iske asyryp kelemiz. Ras, basshylyq tarapynan keminde 3-4 joldama alý qajettigi aıtyldy, arqamyzǵa aýyr amanatty arqaladyq. Oqý-jattyǵý jıyndary da oıdaǵydaı, jospar boıynsha ótip jatyr. Alataý bókterinde jigitterdiń fızıkalyq dene daıyndyǵyn arttyryp, taýdyń taza aýasynda ázirlik jalǵasyp jatyr.
– Jazǵy Azııa oıyndarynda Parıj Olımpıadasynyń joldamasy tek fınalǵa shyqqandarǵa ıaǵnı ár salmaqta chempıon atanǵandar men kúmis medal ıegerlerine beriledi. Odan keıin de álemdik irikteý ıaǵnı lısenzııalyq týrnır eki ret ótedi eken.
– Tórt jylda bir márte aınalyp soǵatyn jazǵy Azııa oıyndarynyń bási de bıik, dańqy da joǵary. О́ziń aıtqandaı, olımpıadalyq jeti salmaqta tek fınalısterge joldama beriledi. Demek, ár boksshy da baryn salatyny anyq. Eýropa qurlyǵynyń oıyndary ótti. Panamerıka oıyndary, Afrıka qurlyǵynyń irikteýi ótedi. Osy ár qurlyqtaǵy joldama beriletin dodada baǵy janbaǵan boksshylar kelesi jyldyń kókteminde Italııa men Taılandta ótetin álemdik týrnırde Olımpıada joldamasy úshin aıqasady.
Bıylǵy jyl sportshylar úshin mańyzdy jarystarǵa toly boldy ózi. Kóktemde bokstan álem chempıonaty Tashkenttiń tórinde dúrkiredi. Qońyr kúzde mine taǵy da iri doda jazǵy Azııa oıyndary kútip tur. Biz olımpıadalyq jeti salmaq dárejesinde qurlyq alamanyna qatysatyn boksshylardy Astana qalasynda ótken Elorda kýboginde iriktedik. Federasııa basshylyǵynyń tapsyrmasy boıynsha ár salmaqta óziniń áleýetin aıqyn kórsetip, myqtylyǵyn dáleldegen boksshylar Qytaıǵa barady.
– Álem chempıony Mahmud Sabyrhan salmaǵyn aýyrlatyp 57 kelige aýysty. Jańa salmaqqa úırenisýi qalaı?
– Mahmud kóktemdegi álem chempıonatyna 54 kelide qatysty. Barlyq qarsylastaryn aıqyn utty. Jastar arasynda da óziniń salmaǵynda álemde teńdessiz ekenin pash etken boksshy. Eresekter sapyna qosylǵanda da shyńdala tústi. Degenmen de 54 keli búgingi tańda olımpıadalyq salmaq bolyp sanalmaıdy. Sodan keıin 57 kelige aýysty. Elorda kýboginde jańa salmaqta óziniń áleýetin baıqap kórdi. Degenmen de bul salmaq dárejesinde álem chempıony ózbekstandyq Ábdimálik Halokov bar. Jasóspirimder Olımpıadasynyń chempıony, Azııa chempıony Halokov ta Qytaıǵa barady. Úndistan eliniń úmiti Muhammed Hýssamýddın, qyrǵyz boksshysy Munarbek Seıitbekuly syndy álem chempıonatynyń qola júldegerleri tur. Mahmudtyń jańa salmaǵynda bulardan ózge de myqtylar bar. Olımpıadanyń joldamasy úshin qandaı asýdan asý kerektigin boksshymyz jete sezinip, tyńǵylyqty ázirlik júrgizýde.
– Jazǵy Olımpıada oıyndarynda erlerdiń jeti salmaq dárejesinde synǵa túsýi básekelestikti, kóshbasshylyq tizgindi ustaý úshin tartysty kúsheıte túskeni belgili. Ásirese jeńil salmaq dárejelerinde aıqas kúsheımek. 48 kelidegi álem chempıony Sanjar Táshkenbaı da olımpıadalyq salmaq 51 kelige aýysýy múmkin ǵoı. Bul salmaqta jazǵy Azııa oıyndaryna ózińizdiń tól shákirtińiz, Tokıo Olımpıadasynyń qola júldegeri Sáken Bıbosynov qatysady.
– Árıne, kez kelgen áýesqoı boksshynyń armany jazǵy Olımpıada oıyndarynyń chempıony ataný. О́zińiz bilesiz, táýelsiz Qazaq eliniń boksshylary jazǵy Olımpıada oıyndarynan 2021 jyly ótken Tokıo Olımpıadasyna deıin altyn medalsiz qaıtpap edi. Tokıo tórinde sportshylarymyzdyń kórsetkishi kóńil kónshitpegeni úshin erinbegenniń bári synady. Syn týra aıtylsa, kemshilik túzeledi, kem-ketik bútindeledi. Olqylyqtyń ornyn toltyrý úshin barymyzdy salyp eńbektenip kelemiz. Sanjar Táshkenbaı Tashkenttegi álem chempıonatynan keıin demalys surady, otbasyn quryp, shańyraq kóterdi. Qazir endi qaıtadan jattyǵýǵa kiristi. Olımpıadalyq salmaqqa ótemin dese kez kelgen boksshynyń júrek qalaýy. Eshqandaı shekteý joq, tek ózińdi dáleldeı alsań, kóshbasshy ekenińdi pash etseń bolǵany.
Áńgimelesken Qýanysh NURDANBEKULY,
«Egemen Qazaqstan»
